Со Меѓународна научна конференција,,Синтези: Рацин и Конески“ денеска во Велес почнува 58 издание на Рациновите средби. Во рамките на конференцијата ќе бидат промовирани научни дела испечатени меѓу двете конференции а, организатори се Институтот за Македонски јазик ,,Крсте Мисирков“, Советот за Македонски јазик при Владата и општина Велес.
Попладнево ќе бидат посетени двата споменика на Рацин во Велес а ќе бидат засадени и млади садници во Шумата на Рацин кај Спомен Костурницата од НОВ, каде се наоѓаат посмртните останки на големиот македонски поет.
Свеченото отворање е вечерва со беседа за Рацин од проф.д-р Атанас Вангелов во просториите на театарот ,,Јордан Хаџи Константинов-Џинот“. Исто така ќе се одржи и традиционалниот Меѓународен поетски митинг, а вечерта ќе биде заокружена со настап на Ансамблот за народни песни и игри ,,Танец“.
Програмата продолжува и утре со посета на Спомен куќата на Рацин каде ќе биде промовирана збирка поезија на млади македонски поети.
Свеченото затворање на манифестацијата е утре вечер со претставување на портретите на годинешниот добитник на Почесното Рациново признание за 2021 Ала Генадјевна Шешкин и на Рациновото признание за 2021 Милован Стефановски.