Претседателите на Северна Македонија и Бугарија, Стево Пендаровски и Румен Радев пред заминувањето во Рим каде ќе оддадат почит на светитите браќа Кирил и Митодиј имаа куса средба со медиумите на скопскиот аеродром.Порачаа дека ова патување ќе биде добра можност за обновување на дијалогот меѓу двете земји.
„Оперативно разговорите помеѓу двете наши земји ги водат владите, така ќе биде и понматаму, ние сме тука ако можеме да ја релаксираме атмосферата и да говориме за проблемот кој постои последнава година на еден поинаков јазик. Мислам дека е потребно да направиме обнова на довербата и како пријатели да разговараме и за најтешките прашања“, рече претседателот Пендаровски по средбата со бугарскиот колега Радев, која се одржа на аеродромот во Скопје.
Бугарскиот претседател се заблагодари за гостопримството и посочи дека постои заедничка волја за развој на пријателство и соработка.
„Заедничкото патување во Рим е прекрасен повод да го обновиме дијалогот меѓу нашите две земји на највисоко ниво и да ја изразиме нашата заедничка волја за развој на нашите односи во духот на пријателството и соработката.“, истакна Радев.