Британскиот парламент денеска ќе има вонредни тричасовни дебати по одлуката на премиерката Тереза Меј да го одложи гласањето денеска за договорот за Брегзит што таа го предложи, изјави претседателот на Парламентот Џон Баркоу, откако опозициската Лабуристичка партија побара вонредни консултации.
– Не е праведно Владата еднострано да ја повлекува програмата, а Парламентот да нема можност да ја изрази својата волја, истакна опозицискиот лидер Џереми Корбин.
Баркоу ги закажа дебатите откако предлогот на Корбин беше поддржан од пратениците од Лабуристичката, но и од Конзервативната партија.
Меј денеска ќе се сретне со германската канцеларка Ангела Меркел за да разговараат околу приговорите од британски пратеници против предложениот договор.
Откако ненадејно го одложи гласање за договорот во британскиот Парламент, премиерката ќе се состане со лидерите на ЕУ, од кои ќе побара уверување во врска со договорот со Унијата за Брегзит, со цел да ги смири стравувањата на британските пратеници.
Нема можност за нов Договор
Не постои веќе можност за преразгледување на договорот за излез на Велика Британија од ЕУ, изјави денеска пред Европарламентот во Стразбур претседателот на ЕК, Жан-Клод Јункер.
Тој истакна дека е изненаден од последните случувањата, а тоа се најавите на британската премиерка Тереза Меј дека ќе се обиде да ги предоговори условите.
– На крајот од минатиот месец постигнавме договор со британската Влада. До вечер ќе разговарам со премиерката Меј, нагласи Јункер.
Тој изјави дека постигнатиот договор е најдобриот и единствено можен.
– Нема простор за предоговарање, единствено постои можност за појаснување и толкување, но без преразгледување на текстот. Тоа треба да им биде јасно на сите, додаде претседателот на ЕК.
Ирскиот премиер Лео Варадкар синоќа соопшти дека со претседателот на Европскиот совет Доналд Туск се согласиле дека треба да се интензивираат подготовките за Брегзит без договор.
Варадкар и Туск во синоќешниот разговор се согласиле дека договорот за повлекување е најдобра опција и оти за тој документ не може повторно да се преговара.
– Тие се согласија и дека подготовките за исход „без договор“ треба да се интензивираат, стои во соопштение од Кабинетот на Варадкар.
Претседателот на Европскиот совет, Доналд Туск синоќа истакна дека ЕУ нема повторно да преговара за договорот за излез на Велика Британија, вклучувајќи го и контроверзниот договор за ирската граница.
Туск на Твитер напиша дека во четврток ќе свика состанок на сите земји-членки на ЕУ, со исклучок на Велика Британија, на кој ќе се разговара за британските преговори за напуштање на ЕУ.
– Нема повторно да преговараме за договорот, вклучувајќи го и „бекстоп“ (безбедносната мрежа), но подготвени сме да разговараме како да ја олесниме ратификацијата на договорот од страна на Велика Британија, додаде Туск.
– Со тек на време, исто така ќе разговараме за нашата подготвеност за сценарио без договор, истакна претседателот на Европскиот совет.
Британската премиерка Тереза Мај пред британските пратеници денеска изјави дека планира да одржи итни разговори со лидерите на ЕУ за да разговара за евентуални промени во врска со „бекстоп“.
Во центарот на спорот, во преговорите за договорот за Брегзит беше правната гаранција дека границата меѓу Северна Ирска и Република Ирска ќе остане отворена, таканаречен „бекстоп“ или безбедносна мрежа, на кој инсистираше ирскиот премиер Лео Вардакар и неговите европски сојузници, и Британија на крајот безволно и со голем отпор се согласи.