Точно напладне, вработените во комбинатот „Југохром“ денеска излегоа на протест во Скопје блокирајќи ја крстосницата пред Судска палата со барање да се вратат на своите работните места. Синдикатот на „Југохром“ бара да се тргне забраната за работа на фабриката затоа што, како што велат, возможно е поставувањето филтри во текот на работниот процес.
Вработените бараат да се повлече забраната за работа на комбинатот, од каде што велат дека егзистираат илјадници жители на Јегуновце и регионот.
„Југохром“ по барање на Државниот инспекторат за животна средина не работи од почетокот на месецот, кога беа исклучени печките, бидејќи сè уште не се поставени филтрите за отпрашување.
Тие забележуваат дека иако печките на „Југохром“ се исклучени, мерните станици во Тетово и понатаму бележат висока концентрација на штетни честички во воздухот.
Веднаш по протестот на вработените, министерот за животна средина и просторно планирање, Башким Амети, огласувајќи се на прес-конференција рече дека ја разбира грижата на демонстрантите, но дека проблемот бил во раководството на комбинатот кој и понатаму немал поставено филтри, а не во Владата.
– Раководството на комбинатот мора најинтензивно и најбрзо да работи на поставување на филтрите за да може комбинатот да работи и вработените да се вратат на своите работни места. Го охрабрувам раководството на комбинатот да најде решение за барањето на вработените сe до поставувањето на филтрите, рече Амети на прес-конференција.
Министерот за животна средина додаде дека одлуката за затворање на комбинатот била конкретна мерка за да се намали нивото на загадување на воздухот во Тетово, но дека на смета на тоа, трпеле вработените.