Врховниот суд денеска ја објави одлуката за Звонко Костовски кој беше обвинет за шпионажа во случајот Пуч кој го отвори Основното јавно обвинителство, а подоцна го презеде Специјалното јавно обвинителство. Врховниот суд во одлуката која ја донесе врз Барањето за заштита на законитоста (БЗЗ)поднесено од СЈО, пишува дека е БЗЗ е делумно основано.
Во одлуката на судот се наведува дека пресудата за Костовски, е нејасна и противречна, и делумно го уважи барањето на СЈО во делот за шпионажата.
„Имено, со оспорената пресуда обвинетиот З.К. од С., огласен е виновен за кривично дело – Шпионажа, затоа што, прибавени содржини од следени комуникации ги предавал на обвинетиот Ѓ.Л., кој му ги предавал на обвинетиот З.В. со намера тој да ги соопшти и предаде на странска држава, организација и лице кое им служи, на кој начин лицата Ѓ.Л. и З.К., за паричен надоместок, му ставиле на обвинетиот З.В. средства за располагање за извршување на кривичното дело и со умисла му помогнале во извршување на кривичното дело – Шпионажа. Во овој дел, пресудата е нејасна и противречна, бидејќи не содржи соодветно образложени причини поради кои обвинетиот З.К. е огласен виновен за помагање во извршување на кривичното дело Шпионажа, во услови кога не е утврдена кривичната одговорност на обвинетиот З.В., кому тој би му помогнал во извршувањето на тоа кривично дело“, пишува во одлуката на Врховен суд.
Во одлуката, исто така пишува дека Врховниот суд најде дека не се основани наводите во барањето за заштита на законитоста за сторена повреда на Законот за кривичната постапка, во делот за кривичното дело Неовластено прислушување и тонско снимање за кое обвинетиот е огласен виновен врз основа на предлог-спогодба.
„Судијата на претходна постапка на рочиште за оцена на предлог-спогодбата, по дадените поуки согласно со закон, испитал дали таа доброволно е поднесена, дали обвинетиот е свесен за правните последици од нејзиното прифаќање и за трошоците на кривичната постапка, па по спроведување на сите законски дејствија и оценка на предлог-спогодбата, донел осудителна пресуда“, пишува во одлуката.
Судиите образложуваат дека Костовски како главен оперативен техничар во Управата за безбедност и контраразузнавање, со своето техничко знаење им овозможил на другите припадници на злосторничкото здружение да пристапат кон незаконско следење на комуникациите и на лица кои не се маркирачи им овозможил да маркираат телефонски броеви и креирал паралелна структура во која биле складирани сите незаконски следени комуникации“. Причината поради која не е кривично гонет од СЈО е затоа што тој бил сведок во постапката бидејќи неговиот исказ бил од особено значење за откривање на другите сторители на кривичните дела.
СЈО на 18 јануари годинава го повлече обвинението за „Пуч“ бидејќи, доказите кои ги откриле не упатуваат дека кривичното дело го сториле Костовски и другите обвинети. СЈО овој случај го води во предметите „Тврдина“ и „Таргет“, чии главни обвинети со помош на Апелациониот суд Скопје и на Врховниот суд се во екстрадициски притвор. Првото рочиште е закажано за 22 декември.
Повеќе стории за случајот на Звонко Костовски: