Врховниот суд, одлучувајќи во корист на синдикатите кои беа исклучени од Сојузот на синдикати, од страна на Живко Митревски, му наложил на Управниот суд да го врати решението на Фросина Ременски со кое треба да се впише Дарко Димовски како нов претседател на Сојузот на синдикати.
Според решението, Управниот суд треба да постапи во прилог на “исклучените“, а адвокатот Звонко Давидовиќ денеска на прес-конференција образложи дека ваквата одлука на Врховен значи дека треба да се спроведе решението на Министерството за труд и социјална политика со кое Дарко Димовски треба да се впише како претседател на Сојузот на синдикатите на Македонија.
Давидовиќ истакна дека нема рок во којшто Управниот суд треба да донесе одлука, но се надева дека судот ќе постапи по решението на Врховниот суд. Според него, во целиот процес на избор на претседател на ССМ и негово впишување во Централниот регистар направени се неколку отстапки. Централниот регистар, како што појасни, постапил надвор од овластувањата, а министерот за труд и социјална политика Ибрахим Ибрахими донел решение во прилог на Живко Митревски врз основа на бланко изјави со поддршка од претседателите на гранковите синдикати во ССМ.
Претседателот на Сојузот на синдикати на Македонија Живко Митревски тврди дека решението на Врховниот суд е донесено врз основа на нелегитимни документи и фалсификувани печати.
Тој тврди дека биле употребени фалсификувани печати од некој кој се претставил лажно како ополномоштен претставник на ССМ и доставил жалба до Врховниот суд со која се бара бришење од Централниот регистар на претседателот на ССМ.
– Со ова се направени дополнителни кривични дела за кои сторителите дополнително се пријавени со проширување на кривичните пријави и со поднесување на мерки за обезбедување и притвор поради повеќекратното повторување на кривичните дела, истакна Митревски.