Врховниот суд на Република Македонија ја одложи денешната седница на која судиите требаше да расправаат за употребата на „бомбите“ како докази во судските постапки и за тоа кој може да поднесува барања за заштита на законитоста.
Според информациите на Мета од Врховниот суд, седницата била одложена бидејќи дел од судиите биле на боледување и таа ќе се одржи во некој од наредните денови.
На дневен ред на седницата се два реферати поднесени од претседателот на Врховниот суд, Јово Вангеловски: дали прислушуваните разговори можат да се користат во судска постапка како докази или, пак, тие претставуваат само индиции, и дали Специјалното јавно обвинителство има право да поднесува вакви барања или, пак, тоа право го има само Јавното обвинителство на Марко Зврлевски.
Врховните судии минатата недела, пред велигденските празници, одржаа седница на која расправаат за овие прашања, но таа заврши без конкретни заклучоци.