Судско рочиште за случајот „Транспортер“, во кој првообвинет е битолскиот градоначалник Владимир Талески, денеска треба да се одржи во скопскиот Кривичен суд.
Минатото рочиште, на 28 септември, беше одложено поради неприсуство на обвинетата Јасмина Никиќ Десановска.
Според одбраната, обвинетата Никиќ-Десановска поради сообраќајна незгода била спречена навреме да пристигне од Битола во Скопје. Судечкиот совет, главната расправа ја одложи за денеска, за кога, како што најави, ќе испрати и опомена за нејзино стражарно приведување.
Во случајот „Транспортер“ се осомничени Талески и уште 20-тина лица за злоупотреба на службената положба во врска со организирањето превоз на ученици во Битола, со што е направена проневера на околу 360.000 евра.
СЈО кон крајот на април поднесе обвинение за овој случај, но поради фактот што дел од обвинетите одбивале да ги примат поканите, судењето е закажано за септември.
Обвинението е за злоупотреба на буџетски пари во вредност од 360.000 денари поради незаконски организиран автобуски превоз.
Талески, како и претседателот на Комисијата за јавни набавки, кои во договор со директорите на училиштата и раководните лица на неколку превозни компании се обвинети дека организирале превоз за учениците во општината.
СЈО за 11 лица достави предлог за притвор, а беше побарана и забрана за располагање со имот ,како и конфискација за 3 стана, 6 патнички возила и 33 автобуси.
Минатата година, Кривичниот совет на Основниот суд Скопје 1 му изрече на Талески домашен притвор, кој два пати беше продолжуван.
По три месеци, Апелацискиот суд во Скопје ја укина оваа мерка и досуди поблага мерка на претпазливост.
Во август Битолското обвинителство отвори нов случај „Транспортер 2“, каде Талески повторно се сомничи за злоупотреба на службената положба и грабеж на општинската каса, со незаконски тендери за превоз на ученици во учебната 2013 – 2014 и 2015- 2016 година.