Манчестер сити го претстави Едерсон (23), досегашен голман на Бенфика, како второ засилување за летниот преоден рок. Бразилецот, кој неодамна дебитира и во нацоналниот тим на „кариоките“, потпиша петгодишен договор со премиерлигашот од „Етихад“.
Гвардиола за него ќе плати 35 милиони фунти што, сметано во британска валута, го прават најскап чувар на мрежата во историјата на фудбалска игра. Јувентус во 2001 година ѝ плати на Парма 33 милиони фунти за Џанлуиџи Буфон.
Но, легендата на италијанскиот фудбал е сè уште рекордер на голмански трансфер изразен во евра. Неговата преселба од „Енио Тардини“ во Торино „тежеше“ 53 милиони, а на Едерсон меѓу „граѓаните“ е 40.
Ривал за место меѓу стативите во првиот тим кај Гвардиола ќе има во Клаудио Браво. Вили Кабалеро ќе биде ослободен од обврските кон Сити, а Џо Харт е ставен на трансфер листа по завршување на сезоната во која беше позајмен во Торино.
Летниот преоден рок сè уште официјално не е почнат, а Сити веќе потроши 78 милиони фунти. Клубот пред неколку дена објави дека постигна договор и со Бернардо Силва од Монако за 43 милиони фунти.