Матурантите денеска од 10 часот ќе го полагаат вториот екстерен испит за кој можеа да бираат меѓу предметите математика, странски јазик, филозофија и естетика. Според податоците на Државниот испитен центар, за тест по математика се решиле 1.529 кандидати. Како и во минатите години, повеќе се определиле за странски јазик, а најголем број на пријавени има за англиски (13.452). Германски јазик ќе полагаат 140 ученици, француски јазик – 32, а руски јазик – 18.
Математика и странски јазик се избор за учениците од гимназиското и од стручното образование, додека за учениците во училиштата од уметностите – странски јазик е во алтернација со филозофија (во училиштата за ликовно образивание и има 14 пријавени) и со естетика (во училиштата за музичко образование и се пријавени 66 кандидати).
Според наставниот јазик, денешниот испит на македонски јазик ќе го полагаат 10.886 матуранти, на албански – 4.134 и на турски јазик – 274.
Првиот екстерен испит – мајчин јазик, го полагаа во саботата. Тој беше задолжителен за сите 15.294 кандидати колку што се пријавени за матурата во оваа учебна година (македонски јазик и литература 10.848, албански јазик и литература – 4.078 и турски јазик и литература – 272). Од вкупно пријавените над 15.000 кандидати, 7.050 се од гимназиско образование, 7.983 од средно стручно образование и 261 од средно уметничко образование.
Резултатите од двата екстерни испита ќе бидат објавени на почетокот на јули, односно најдоцна 30 дена од последниот (вториот) екстерен испит.
За матурантите кои на испитите на 5 и на 11 јуни имаат коронавирус или се наоѓаат во изолација, овозможени се дополнителни термини за полагање на 25 и 28 јуни, со приложување потврда до училишните комисии.
По тестовите од екстерните, матурантите до крајот на месецот ќе ги полагаат и двата интерни испита во училиштата, а покрај нив имаа и обврска за изработка на проектна задача која, според календарот, се реализираше од 15 март до 30 април.
Матурантите што нема да ја положат матурата во јуни или не во целост, ќе имаат втора можност во августовската сесија – термините се 11 август за првиот екстерен и 13 август за вториот екстерен испит.