Јавното претпријатие „Паркинзи Општина Центар“ (ПОЦ) во март ќе почне со поставување на машини за рециклирање на пластични и стаклени шишиња на девет локации на територијата на општина Центар. Тие се веќе набавени, а до крај на годината е најавено купување на уште 18. Идејата е за секое одложено шише, граѓаните да добиваат по 1,5 денари, средства што подоцна ќе може да се користат за паркирање.
„Парите на жителите на општина Центар ќе се слеваат на нивната картичка „Грин пеј карт“, со која ќе можат да купуваат производи со попуст во одредени маркети, продавници, локали или да ги плаќаат услугите што ги нуди претпријатието. За овој проект се предвидени субвенции од Буџетот на Општина Центар за 2020 година, со што, за секое рециклирано шише се обезбедени 1,5 денари. На овој начин ќе ја подигнеме свеста кај граѓаните за рециклирање“, рече директорот на ПОЦ, Васко Кичевски.