Во генерално мирната дебата на Македонската радио телевизија, лидерите на СДСМ и ВМРО-ДПМНЕ, Зоран Заев и Христијан Мицкоски, не се согласија за ништо, па и за надворешната политика. Во делот посветен на договорите со Бугарија и Грција, Заев зборуваше дека тоа е влог во иднината и врвен акт на патриотизам, додека за Мицкоски сето тоа било капитулација и понижување на македонскиот народ.
Заев на неколку пати се вртеше кон камерата за да им се обрати директно на граѓаните, наместо да гледа кон Мицкоски, па и кога зборуваше за договорите со Грција и Бугарија.
„Господинот Мицкоски вели дека ќе ги поништува договорите. Ние со тие договори го потврдивме Гоце Делчев како Македонец и револуционер, но и како човек којшто гледал на светот како поле за културен натпревар на народите. Тоа е мудроста во политиката којашто ја имаме ние и којашто носи успеси. Ние го донесовме македонското знаме пред НАТО, а ќе го донесеме и пред Европската унија. А при тоа ќе донесеме и плати и пензии, нови инвестиции, работни места. Ќе ја донесеме Европа дома за да останеме дома. Сето друго е само закана, изолација, горчина, гнев и уназадување на државата“, им се обрати Заев директно на гледачите.
На ова Мицкоски реплицираше дека сѐ што кажал Заев ниту е реално ниту вистинито. „Вие ја оковавте во пранги и Македонија и вашата партија. Денеска вие со вашата политика успеавте да нѐ направите енклава на Балканот“. Според него, тоа време завршувало и на 15 јули на власт „доаѓаат прогресивни сили кои знаат како да ја одведат Македонија таму каде што треба, а тоа е полноправно членство во ЕУ без да оди со свиткан ‘рбет“.
Заев, кој изгледаше многу посмирен (исто како и Мицкоски) за разлика од првата нивна дебата полна со кавги на ТВ24, зборуваше дека со договорите со Бугарија и Грција Македонија докажала дека може да биде пријател со сите. „Со тие договори е загарантирана иднината на Македонија, на македонскиот идентитет и македонскиот јазик. Докажавме дека можеме да бидеме Европејци“, ги повтори познатите тврдења Заев и уште додаде дека „сѐ друго што се нуди е одење во изолација, шовинизам и лажен национал-патриотизам“. Мицкоски на ова одговори дека употребата на зборот шовинизам требало да биде повнимателна, затоа што шовинизам е „кога ја напаѓате Силјановска, Рашела, Тамара, а одите дури и чекор понатаму“.
Мицкоски уште зборуваше дека Заев и неговата партија донесле само срам и понижување. „Ние денеска се срамиме кога шетаме низ Брисел затоа што вие имавте две ипол години за да ја оправдате довербата. Не само што не успеавте, туку напротив, потпишавте капитулација и ги избришавте сите оние жртви на генерациите за нашата независност“.
„Израдувајте се барем еднаш“, му велеше заев на Мицкоски. „За НАТО не аплаудиравте. Европската комисија ја усвои преговарачката рамка. Во офоцијалниот документ напишаа македонски јазик. Македонски напишаа. Како да ви напишат? На небото ли да ви напишат македонски. Израдувајте се! Вие се радувате ако некој нѐ закочи. Никој нема да нѐ закочи. И кажете – ќе ги поништувате ли овие договори или не?“, го праша Заев.
Лидерот на ВМРО-ДПМНЕ го повтори вече познатиот став дека „би биле лицемери ако ја игнорираме реалноста“. Велејќи дека не може да се сложи со нешто што Заев го потпишал за пари и власт, Мицкоски додаде дека „ќе дадеме сѐ од себе да ги исправиме сите грешки што ги направи оваа власт со капитуалацијата. Дали ќе успееме – не знам“.