Предметот „Монструм“, се врати на почеток, но само формално. Продолжи каде што застана, откако претходно се смени поротник, но во интерес на постапката и начелото за судење во разумен рок, одбраната се сложи да продолжи без повторно читање на обвинението и без повторно изведување докази.
Од судот, ја информираа јавноста дека заради промена на судечкиот совет, односно поднесена остава на еден судија – поротник, а во брзо време и истек на мандат на друг судија – поротник, со назначување нови како и дополнителни – резервни поротници, главната расправа формално почна одново, а продолжи со изведување нови докази.
„Имено, заради ефикасност на постапката, начелото за судење во разумен рок и пред се Уставно загрантираните права и обврски на обвинетите и оштетните во постапката, одбраната се согласи наместо повторно изведување на доказите, судењето да почне формално од почеток само со пренесување на сите досегашни изјави и изведени докази во новиот записник, со што расправата продолжи онаму каде и претходно застана, а тоа е со изведување на нови докази и сослушување нови сведоци“, стои во соопштението од судот.
На овој начин судот, во согласност со одбраната, а постапувајќи според Законските одредби не дозволи дополнително одолговлекување на постапката, што е од интерес пред се на обвинетите и оштетените во предметот. Во судницата родителите на момчињата доставија видео од собраниски говори, како дополнителни докази. Нови сведоци ќе повика и Обвинителството. Станува збор за доскорашниот премиер Зоран Заев, Зоран Трајковски, Ѕвонко Костовски.
Заев е повикан од обвинителот Гаврил Бубевски да сведочи во однос на неговите информации за предметот, додека Звонко Костовски заради начинот на кои се предадени бомбите од УБК до СЈО, а Трајковски заради телефонските разговори кои беа слушнати во судницата, на кои зборува тој. Родителите на убиените момчиња го предложија за дополнителен сведок Синиша Алексовски, соработникот на Ѓорге Иванов, а обвинетите побараа да сведочат момче и девојка „алфи“ од МВР кои први дошле на местото на злосторството.
Процесот Монструм беше вратен на повторно судење од страна на Врховниот суд, кога највисокиот суд ги укина пресудите. Тогаш случајот го презеде Специјалното обвинителство, а по згаснувањето на СЈО предметот се врати на редовното, односно во Обвинителството за гонење на организиран крими ал и корупција, а обвинението го застапуваат обвинителите Фатиме Фетаи и Гаврил Бубевсли.
Во Монструм обвинети се шестмина за петкратното убиство во 2012 година кај Смилковското езеро. Алил Демири и Африм Исмаиловиќ се во бегство. Тие добија нов адвокат по службена должност, откако досегашниот Насер Рауфи се повлече како нивен бранител. На обвинителна клупа се седнати четворица од обвинетите, Агим Исмаиловиќ, Фејзи Азири, Хаки Азири и Сами Љута. Првично беа осудени на доживотен затвор под обвинение за тероризам, но по укинувањето на пресудите, Врховниот суд ги ослободи од притвор осудените и им определи мерки на претпазливост. Адвокатот Насер Рауфи повеќе не е адвокат на бегалците Алил Демири и Агим Исмаиловиќ, на кои им е назначен адвокат по службена должност, Милица Гроздановска. Наредното рочиште е закажано за 3 февруари.