„Никој не се надеваше дека толкави глупости може да се кажат. Ако се бориме за правна држава, треба да оставиме правните процеси да течат“ рече денеска премиерот Зоран Заев, коментирајќи го вчерашното интервју на лидерот на ВМРО-ДПМНЕ Христијан Мицкоски во кое тој вели дека е следен од полицијата и оти очекува покрај останатите припадници на партијата да го уапсат и него.
„Однапред да давате квалификации за некој дали има вина или не, дали некој нарачувал или не, е срамота“ рече Заев, одговорајќи на новинарски прашања по пуштањето во употреба на новиот погон на фабриката „Тиамо“ во Глумово, Сарај.
Заев додаде дека секој што го прекршил законот треба да одговара, но преку судски постапки, аргументи и докази, а секој што е невин, секако треба да биде ослободен.
На прашањето дали верува во правосудството, Заев рече дека има големи девијантни појави кои се катастрофа за општеството, но и одлични примери.
-Јас сум веројатно првиот премиер кој вака отворено фрла ракавица кон една независна власт како што е судската. Нема правда, ако таа не е еднаква за сите, ако секој не одговара согласно Законот, рече Заев.
Претседателот на ВМРО-ДПМНЕ, Христијан Мицкоски, вчера рече дека очекува да биде уапсен.
-Имам јасен план во таков случај, свесен сум дека може до тоа да дојде, сум разговарал со луѓе од моето семејство дека со Заев и луѓето околу него се може да се очекува. Па и тоа да дојдат да ме приведат, ова е апел до луѓето кои се врткараат од специјална единица од МВР околу мојата куќа со изговор дека го набљудуваат училишниот двор во близина на мојот дом. Знам која е целта на оваа деспотаска власт – рече Мицкоски.