Лидерот на СДСМ Зоран Заев смета дека Манифестот што викендов го објави ВМРО ДПМНЕ како прилог за решавање на политичката криза, се само „куп изговори за да се развлекува процесот“.
-Процесот мора да биде дозволен да се движи според описот во Уставот, по законите и по Деловникот во Собранието, а тоа значи да се заврши примопредавање на власта. За се може да се дебатира, но да се изнаоѓаат вакви банални причини со било какви претпоставени непостоечки закани врз нашата Македонија дека ние тоа сега треба нешто да штитиме, дека секој момент нас некој ќе не нападне или нешто ќе ни одземе, навистина овие лаги повеќе не поминуваат ниту кај нив самите, изјави Заев.
На новинарско прашање, што се следните чекори на неговата партија доколку продолжи ваквата ситуација во Собрание, Заев рече дека има алтернативи коишто Уставот, законите и Деловникот го дозволува.
– Во делот на пленум мнозинството да носи одлуки и согласно уставните, законските, мислам пред се на Законот за Собрание и Деловник на Собранието, мнозинството ќе го преземе под контрола водењето на седницата, рече Заев.
Од посетата на претседателот на Европскиот совет Доналд Туск и средбата со претседателот Ѓорге Иванов очекува „прецизни укажувања од пријтелска Европа, токму во делот на излез, на решенија поврзани со политичката криза во Македонија“.