Лидерот на СДСМ, Зоран Заев се огласи на социјалните мрежи во врска со синоќешната полициска блокада на магацинот во кој се пакуваа хуманитарните пакети од неговото семејство за социјално ранливите категории. Настанот го нарече скандал, побара истрага од надлежните институции и одговорност за акцијата.
„Злоупотреба на полицијата и државни институции од ВМРО-ДПМНЕ, Наќе Чулев и Христијан Мицкоски кои се обидоа да спречат хумана, солидарна, акција за помош на моите сограѓани. Очекувам од надлежните институции да спроведат истрага и да ги посочат виновниците. ВМРО-ДПМНЕ преку полициски структури попречува хумантирна помош за граѓани преку злоупотреба на државни институции. ВМРО-ДПМНЕ со полициски режимски структури синоќа до рани утрински часови вршеше притисок и закани врз волонтери и членови на граѓанска организација. Држеа млади волонтери во полициска станица, им се закануваа, само затоа што некој добил партиска задача и му смета солидарноста. Тоа е одлика на нелуѓе од еден режим којшто одамна го поразивме заедно со граѓаните. И затоа таквите партиски насилници мора да сносат одговорност“, напиша Заев на својот Фејсбук налог.
Во магацин на улица „Ѓорги Трајков“ во Струмица, каде се пакуваат хуманитарни пакети што се донација од семејството Заеви, синоќа влегле полициски службеници и јавен обвинител. Полицијата и денеска беше пред магацинот и ја блокира дистрибуцијата на хуманитарната помош што е намената за граѓани од социјално-ранливи категории.
Синоќешниот настан го потврдија и од ОЈО Струмица. Струмичкиот јавен овинител, Миле Петков, рече дека обвинителството постапило по барање на полицијата.