Дел од тие што правеа инциденти на Мечкин Камен беа и во Собранието на 27 април. Тоа е група од 50 луге кои се од некого мотивирани, и продолжуваат да испраќаат пораки на поделби, а нам ни треба единство, посебно пред вакви важни прашања, рече премиерот Зоран Заев во интервју за 1тв.
Тој кажа дека два дена пред прославата на Илинден, имал средба со Иванов во Кабинетот на претседателот на која разговарале за случувањата во регионот, за актуелните политички прашања и за безбедноста на државата. На оваа средба станало збор и за прославата на Илинден и се согласиле дека треба да бидат внимателни.
„Но за жал се случи мотивација и од самиот говор на претседателот, кој охрабри наши граѓани да нападнат висока странска делегација и владина делегација“, рече Заев.
Тој истакна дека оваа група која ги предизвикала инцидентите и кои користат физичко насилство и маваат со предмети не го прават тоа бесцелно.
„Сите знаат дека Македонија има еден правец, а тоа е евроинтеграцијата зашто тоа ни обезбедува убава иднина на државата. Обезбедувањето добра иднина на држават на сите не им одговора“ рече Заев, кој нагласи дека многу поважно е однесувањето на политичкиот државен врв – на Претседателот на државата, шефот на опозицијата кои не нудат алтернатива.
„Никој не кажува како две десни партии од Македонија и Грција ќе направат подобра договор – што не го направија изминатите 10 години? Каде беше Претседателот на државата сите овие годни наназад да направи некој исчекор, некој подобар договор“, рече Заев.
Според премиерот добро е што на референдумот нема да одлучуваат ниту Иванов, ниту Мицксоски, ниту Заев, туку ќе одлучуваат граѓаните. Тој очекува граѓаните во огромно мнозинство да излезат и да го поддржат членството во ЕУ и НАТО и Договорот со Грција.
Заев кажа и дека и претседателот Иванов и шефот на опозицијата биле редовно информирани за текот на преговорите секогаш кога имало поместување во разговорите и на средбите се разговарало за сите детали, како да се зачува иднината на државата и да се сочува идентитетот.
Тој ги потсети Иванов и Мицкоски дека со години, како што рече, „се крстеа“ во референдумот, за денеска да не можат да соберат сили да повикаат на референдум, па народот да излезе на гласање, без разлика дали ќе гласа „за„ или „против“.