Еве ги кандидатските листи, еве ги победничките листи, рече лидерот на СДСМ, Зоран Заев во својот говор на почетокот на 21.конгрес на партијата на која треба да се изгласаат листите за пратеници за предвремените парламентарни избори на 11 декември.
„Не било лесно ова со кандидатските листи, но можам да ви кажам дека донесовме одлука и во името на раководството на партијата и во името на граѓаните ја барам вашата поддршка за пратеничките листи на СДСМ и на граѓаните за заедно да излеземе на избори и да донесеме историска граѓанска победа“, рече Заев.
Покажувајќи кон кандидатските листи, Заев рече „Еве ги кандидатските листи, еве ги победничките листи“.
„Ова е една соработка во која партијата ги отвора вратите и душата кон граѓаните. Отвораме место за сите, тука не има од различни региони, различни професии, различна етничка припадност. Ние имаме шанса да создадеме блескав парламент, кој ќе избере чесна влада. Дајте ја поддршката на кандидатските листи кои носат пораз на едноумието. Да испратиме порака дека Зоран Заев не е сам“, рече Заев.
Неговиот говор беше поздравен со аплауз и овации од присутните делегати.
Конгресот започна со доцнење од два часа, но и покрај чекањето, делегатите и раководството на партијата го поздравија со голем аплауз.
Моментално трае работниот дел на конгресот кој е затворен за јавноста, а новинарите повторно ќе бидат повикани во салата откако делегатите ќе донесат одлука.
Инаку денеска медиумите ги објавија носителите на листи и пратеници, кои според наши информации на Централниот одбор биле малку изменети.
Носителите и кандидатите на листите вечерва ќе бидат познати официјално откако за тоа ќе се расправа на Конгресот на партијата.