Премиерот Зоран Заев денеска кажа дека во овој момент нема да го разреши генералниот секретар Рашковски затоа што не сторил ништо незаконски, а се извинил и „до небо“ за навредите кои на аудио снимката која беше објавена во дел од медиумите се слуша дека ги упатува кон Илаијанците и ромската заедница.
„ Се работи за тендер на М-НАВ кој што е завршен уште во 2016 година, но никако не се потпишувал за да почне неговата имплементација. Сето ова беше јасно и детално објаснето и верувам дека ќе има соодветна истрага и кривични постапки. Генералниот секретар доби насоки од Владата да ги забрза процесите затоа што се работи за систем важен за безбедноста.
Секој кој што покажува ароганција треба да сноси одговорност но и секој има право да ги каже своите аргументи во јавноста. Ние го почитуваме критичкиот осврт на медиумите, но не можете некој да го правите салата кога сакате и како сакате. Владата нема да поднесе тужби не е наша работа да се тужиме со новинарите и медиумите но секоја индивидуа има право да го заштити својот интегритет.
Кога прифаќаме функции тоа не значи дека секој може да биде боксерска вреќа и кога тоа го заслужува и кога не го заслужува“ рече Заев.
Заев кажа дека Рашковски не договорал тендер или избор на фирма, затоа што тендерот и изборот на италијанската фирма „Леонардо“ биле завршени во 2016 година.
„Не се работи за никакви провизи, за никакви награди затоа што работата била завршена уште пред три години во 2016. Не се договорал тендер, туку само следни чекори за негова реализација“ кажа Заев.
За навредите кои се слушаат на адуио снимката, советникот на Заев за надворешна политика Дане Талевски денеска упатил извинување до италијанскиот амбасадор во земјава, а во име на Владата се извини и Заев.
„ Италија е земја пријател, континуиран подржувач на Македонија, исто така ромската заедница – за неа псоветуваме огромен дел од проектите, алоцираме повеќе средства за подобар живот на Ромите и ја користам приликата да упатам извинување и од име на Владата, но на крајот дали тоа било монтирано со употреба на зборовите или не, ќе го каже истрагата„ рече Заев.
На директно новинарско прашање дали ќе го смени Рашковски Заев кажа:
„ Ќе ги согледаме последиците па ќе донесам одлука. Во овој момент – не, затоа што нема ништо законско – ги извршува работите добиени од Владата, а за навредите се извини“ .
Повеќе за темата:
Рашковски се извини за вокабуларот во аудио снимката, за тендерот ќе чека одлука од Судот
Случај Рашковски-Леонардо: Аудио-снимката во ОЈО, се отвораат нови непознаници