Доколку ВМРО-ДПМНЕ, ДУИ, ДПА, Движењето БЕСА, ДОМ, ЛДП, партиите на Србите, на Ромите и на Турците сакаат да нема одложување на изборите треба да се донесе законот за јавно обвинителство, порача лидерот на СДСМ, Зоран Заев оти, како што истакна, така било договорено со сите партии во агендата до распуштање на Собранието на 12 февруари.
„
„Ако некој го прекрши тоа, дотогаш распуштање на Парламентот и распишување на изборите нема да се случи“, рече Заев.
Премиерот Оливер Спасовски вчера во интервју за национална телевизија рече дека не верува во одложување на изборите, но и доколку се одложат, според него, тоа ќе биде по месец или два.
„Европските перспективи мора да дојдат час поскоро. Сега кога ќе ги погледнете тие два интереса, навистина е поважен интересот и напредокот на државата“, потенцира Спасовски.
Вчера беа одржани повеќе билатерални средби со претставниците на пратеничките групи на кои се разгледуваа нивните амандмани за законот за ЈО. Од Министерството за правда информираат дека целта на тие средби е обезбедување консензус и двотретинско мнозинство.
За ВМРО-ДПМНЕ е прифатливо законско решение што ќе се изработи и произлезе од самата експертска јавност која беше вклучена во јавната дебата за законот за јавното обвинителство, вели лидерот на опозициската партија Христијан Мицкоски.
„Потребно е квалитетно законско решение, а не онакво какво што власта турка на мала врата на само недела и пол пред распуштање на Парламентот. Затоа за ВМРО-ДПМНЕ, со цел да не се робува на суетата на одредени министри и стравот на Заев од одговорност, е прифатливо законско решение кое ќе го изработат и ќе произлезе од самата експертска јавност која беше вклучена во јавната дебата за законот за јавното обвинителство“, наведува Мицкоски во пишана изјава.
Мицкоски вели да не се креира законско решение за заштита на партиските интереси на поединци, туку решение предложено од експерти кое ќе биде прифатливо за Собранието.
