Новиот јавен обвинител треба да биде независен, да нема врска со политички партии но истовремено да оставил впечаток во јавноста со своите ставови, изјави вечерва премиерот Зоран Заев кој вечерва на државната телевизија одговара на прашањата на осуммина телевизиски новинари.
Првото прашање на новинарите до Заев беше да го открие името на новиот јавен обвинител откако владата ја почна процедурата за разрешување на Марко Зврлевски.
“Ние сакаме да мотивираме независни луѓе од обвинтелската, професорската и адвокатската фела и секој што ќе биде заинтересиран и нема врска со политички партии. Но притоа имал свои ставови за одредени прашања и оставил впечаток кај јавноста и се способен да се фати во костец со оваа одговорна функција. Процесот на одлучување почнува кога завршува функцијата на Марко Зврлевски. Ние сакаме да го скратиме овој процес но негово легитимно право е да поднесе или не оставка. Ние денес ја почнавме оваа процедура.
Правото на предлог е на владата, право на изборот е на Парламентот а помеѓу е правото на Советот на јавни обвинители.
Сакам да испратам една порака. Да ги мотивирам сите кои се подгтовени да се фатат со оваа функција со историска улога да придонесат кон враќање на правната држава каде што нема да има никакво мешање на државата. Да бидат доволно охрабрени и сами да се пријават јавно за оваа функција. Па нека јавноста се произнесе”, рече премиерот.
Заев додаде дека не сака да наметнува партиски решенија и дека очекува јавна дебата за ова прашање.