Чест ми е да зборувам за европските вредности денес, од мојата Струмица, европска Струмица, на овој случаен и симболичен датум – 27 април 2022 година, 5 години од победата на храброста и демократијата, врз стравот и диктатурата кои на денешен ден во 2017 година во македонскиот парламент се обидуваа тогаш да ја завијат Македонија во црно, рече екс премиерот Зоран Заев денес на панелот за иднината на Европа, што се одржува во Струмица во организација на француската амбасада.
Денес, на 27 април, сакам да честитам од тука нов мандат на претседателот Макрон – тој носи нова победа на европските вредности над заканите кои национализмот ги носи врз Европа, рече Заев. Кога е во прашање да се донесе одлука меѓу либерализам наспроти конзервативизам, ние левичарите имаме само еден избор – тоа е либерализамот – слободата, отвореноста, современоста, дополни тој.
„Во мојот говор во Атина пред неколку дена реков дека ја оспорувам тезата дека десницата или крајната десница владеела со Европа. Ниту Макрон во Франција е десница ниту партијата на Голоб во Словенија која ги доби парламентарните избори во неделата е десница. Се радувам на овие гласни крикови кои носат победа на европската слобода“, истакна екс-премиерот.
„Кој можеше да помисли дека во очи 9 Мај, годинава, натпреварот ќе биде кој победил. Европа или Путин? 9 Мај – 2022 година – чија победа е поголема? Онаа над фашизмот или онаа за Европа? Или онаа против Европа? Дали сме за воена агресија или за културен натрпевар меѓу народите? За Путин или за Делчев? За агресија или за европски слободи? Имаме само еден избор и мораме да го направиме тој избор“, подвлече Заев.
Бидете уверени, рече тој, дека 9 Мај годинава ќе биде употребен за пропаганда. И апелирам – сите ние, секој од нас, да се држиме цврсто до нашите европски постулати – 9 Мај е нашата црвена слободарска база – на 9 Мај Европа го порази фашизмот – на 9 Мај годинава да останеме со кренати глави – да не дозволиме агресијата да ни го земе 9 Мај.
Заев рече дека руската агресија врз Украина е причината зошто ЕУ мора да ги реши сите отворени прашања во регионов. Особено нашето, македонското прашање. „Не постои оправдување за ниту една цивилна жртва во Украина. Не постои оправдување за украинските деца кои со огромна грижа бараат безбеден дом насекаде низ Европа. Нема да постои оправдување доколку падне проектил врз спомен куќата на Крсте Петков Мисирков во Одеса“, порача тој.
Ја прашувам ЕУ, рече Зев, од мојата европска Струмица која се граничи со Грција и со Бугарија – дали механизмите за одлучување на Унијата се маханизми за развој на европска идеја? Ако не се, а знам дека не се, тогаш променете ги. ЕУ мора да носи одлуки во сопствена корист, а не во корист на национализмот.
„ЕУ мора да знае дека на православното население од Балканот не му е лесно да застане наспроти православниот руски народ. Ама нашите народи се мудри – ние не застануваме наспроти рускиот народ, туку наспроти воената агресија на Путин врз суверенитетот врз братска Украина“, рече Заев. (Б.Ј.)