Достоинството и идентитетот се многу важни во преговорите со Грција, истакна меѓу другото премиерот Зоран Заев, одговорајќи на новинарски прашања при денешната посета на Неготино. Тој рече дека нема да изнесува детали, за, како што нагласи, да не излезе дека се преговара преку медиумите.
– Медијаторот Нимиц го води процесот, тој ги знае во суштина работите кои можат да поминат, кои не можат да поминат кај едната и кај другата страна. Важно е да се гради довербата помеѓу двете страни во функција на решавање на проблемот. Мене ми е драго што се разглобени во суштина сите отворени прашања. Ако тргнеме од некои седум позиции кои беа појдовните точки на разговорите, знам дека веќе е намалено на четири позиции, три се отстранети. Јас верувам дека со политиката на новата Влада многу брзо ќе можат да се отстранат и другите позиции, изјави Заев.
„То вима“: Што содржи пакетот идеи на Нимиц за решение на спорот
Тој потенцира дека Република Македонија сака решение, а Владата, како што наведе, прави буквално се, се обидува да гради внатрешен консензус во државата, во функција на изнаоѓање конечно решение.
– Навистина сме оптимисти за изнаоѓање решение. Секако се испорачуваат одредени пораки од нашиот партнер од грчката страна, за одредени линии и слично, јас верувам дека треба да изнајдеме решение за добробит на граѓаните на двете земји. Ако бидеме навистина оптимисти во овој процес, ако сакаме навистина искрено да се изнајде решение, тоа е можно, процесот има временски период пред себе. Се надевам дека секој следен чекор ќе не приближува во делот на сите оние ставки кои се отворени, а буквално треба да бидат мост на сплотување и конечно изнаоѓање решение на проблемот со името кој Република Грција го има со нашето уставно име, рече Заев, повикувајќи да му се даде шанса на преговарачкиот процес.
Граѓаните, додаде Заев, знаат кои се македонските ставови во поглед на ова и на другите прашања, но мора да се биде внимателен и да се даде шанса на процесот за постигнување решение.
Во однос на географската одредница, потврди дека е прифатлива опција за македонската страна и потсети дека се споменуват неколку имиња.
– Тоа значи за нас е прифатливо име со географска одредница, односно ги отклонуваме сите други кои беа временска одредница, или некои други укажувања кои беа како предлози, информираше премиерот.
Соопшти дека е охрабрувачки што некои работи се придвижени.
– Веројатно тие беа најлесните, но добро, тоа е сигнал за нас и охрабрување за грчката страна дека е можно да се изнајде решение. Секако, суштинските позиции се многу значајни, името, уставот дали ќе се менува или не, јазикот и други работи кои таму се спомнуваа. Тоа е суштината на самиот преговарачки процес и можноста за изнаоѓање на решение, рече Заев .
Очекува двете страни да бидат прагматични, а евентуалното решение да биде потврдено на референдум.
– Дај Боже да дојдеме до решение да можеме да излеземе на референдум, дециден е Заев.
Нацрт договорот, рече, е еден од алатките, се прават одредени скицирања за можни решенија, влијанија врз двете страни, како тоа би било прифатено од граѓаните на двете страни, од институциите и слично.
– Едно од тие скицирања е и нацрт верзија за меѓународен договор, спогодба меѓу двете страни, што секако на крајот се надеваме дека треба да биде ратификувана во парламентите. Но не да заборавиме, дека што и да се разговара, на билатерално или на министерско и премиерско ниво, се враќа кај Нимиц, затоа што процесот е предводен од ОН преку медијаторот и на крајот мора да ги има правно-формалните импликации во ОН, изјави Заев.
Ерга омнес и промена на Уставот
Грчката Влада преку портпаролот Димитрис Ѕанакопулос рече дека останува позицијата за сложено име за внатрешна и надворешна употреба и промена на македонскиот Устав.
– Тоа значи дека не може да биде поинаку од промена на уставното име на соседот и ова, сметаме дека е рамката во која би можело да се најде токму ова заемно прифатливо решение, рече Ѕанакопулос.
Ѕанакопулос на гостувањето во емисија на Првата програма на грчкото државно радио изрази оптимизам дека може да се постигне заемно прифатливо решение.
– По вчерашната средба преговорите продолжуваат врз база на рамката што беше поставена со нашите соседи. Оптимисти сме дека ќе успееме да постигнеме заемно прифатливо решение. Сепак, не сакам во овој момент да предвидам ништо. Работиме во насока да се постигне договор за сложено име што ќе важи за сите и за севкупна употреба, за што предуслов е уставна ревизија кај соседот, особено во однос на уставното име, рече Димитрис Ѕанакопулос за грчкото радио.
Портпаролот на грчката Влада не ги коментира техничките детали од преговорите, особено во однос на тоа дали нацрт спогодбата и е доставена на македонската страна.
Утре средба Димитров- Коѕијас
Грчките медиуми денеска пишуваат за нова можна средба меѓу Никола Димитров и Никос Коѕијас и тоа во следните два дена во Софија.
Според државната ТВ ЕРТ, средбата треба да се одржи во четврток, додека пак останатите медиуми со доза на резерва објавуваат дека е можно и веројатно двајцата министри за надворешни работи да се сретнат на маргините на неформалниот состанок Гимних во Софија, пренесува МИА.
-Господата Коѕијас и Димитров одново ќе се сретнат, утре, четврток во Софија, на неформалниот совет на МНР од ЕУ со колегите од земјите кандидати за интеграција, објави утринава грчката државна телевизија.
Весникот „Авги“, што важи за гласник на СИРИЗА, пишува дека „се згуснуваат чекорите за решавање на македонското прашање“, а по средбата во Виена веројатно е дека Димитров и Коѕијас одново ќе се сретнат во Софија.