Сложено име за внатрешна и надворешна употреба и промена на македонскиот Устав е позицијата. Ова вчера го повтори портпаролот на грчката влада, Димитрис Ѕанакопулос, речиси истовремено додека во Виена се одржуваше средбата на министрите за надворешни работи Никола Димитров и Никос Коѕијас, со медијаторот Метју Нимиц.
– Тоа значи дека не може да биде поинаку од промена на уставното име на соседот и ова, сметаме дека е рамката во која би можело да се најде токму ова заемно прифатливо решение, рече Ѕанакопулос, пренесува МИА.
„То вима“: Што содржи пакетот идеи на Нимиц за решение на спорот
Истата позиција ја повтори и заменик-министер за поморство на Грција, Нектариос Санторињос ги повтори грчките позиции за сложено ерга омнес име, објаснувајќи дека „не може да го смениш името за севкупна употреба и за во внатрешноста на земјата, ако не го смениш Уставот“.
Според лидерот на партијата Сојуз на централисти, Василис Левандис, пак, Грција го загубила спорот со името, со самото тоа што разговара за сложено име со вклучен терминот Македонија.
Левендис, кој е против името Македонија, завчера се сретна со американскиот амбасадор во Атина, Џефри Пајат, по што истакна дека Американците се категорични дека ова прашање е завршено.
Дел од медиумните во Атина коментираа дека нацрт спогодбата од грчката страна е подготвена, а дел, сѐ уште се работи на неа, а Коѕијас на Димитров ќе му ја претстави во Скопје при патувањето со директен лет од Атина, веднаш штом, како што пишуваат медиумите, и во пракса се промени името на скопскиот аеродром.
Коѕијас, говорејќи за државната ТВ ЕРТ пред две седмици, рече дека нацрт спогодбата ќе биде готова кон средината на февруари.
Во кусото соопштение од вчерашната средба во Виена се наведува само дека „по конструктивната средба која е дел од напорите за наоѓање на заедничко прифатливо решение за надминување на разликата околу името, Министрите за надворешни работи се согласија да ги продолжат напорите под покровителство на ОН“.
Двете средби се оценуваат како почеток на сериозните преговори меѓу Македонија и Грција со посредство на ОН. Од македонската Влада велат дека досега се воделе разговори, размена на информации, а овие средби на ниво на министри за надворешни работи значат всушност почеток на преговорите и еден вид на фотофиниш. Очекувањата се дека овие преговори ќе траат и во текот на март.