Народот препознава дека ВМРО-ДПМНЕ ја злоупотребува трагедијата во Тетово за политички цели. Никогаш не реков дека е банално да одговараме на прашањата за трагедијата. Банално е да се прашува дали има некој што може да го замени Заев во СДСМ. За трагедијата ќе одговараме и зборуваме колку што е потребно, рече премиерот Зоран Заев на дуелот со лидерот на ВМРО-ДПМНЕ, Христијан Мицкоски на ТВ Канал 5.
Само вам ви личи да имате толку голема желба за власт што се обидувате политички да профитирате од се. Вие сте станале истражител, ги коментирате сите детали, од ракав тропате работи кои се далеку од секоја можна вистина, му се обрати Заев на Мицкоски.
Премиерот додаде дека е проѕирно злоупотребувањето на оваа трагедија од страна на Мицкоски и ВМРО-ДПМНЕ. Тој додаде дека граѓаните го гледаат и препознаваат тоа.
„Сеете лаги, манипулирате, поттикнувате антиваксери, неодговорно ја замајувате јавноста, додека Владата се труди да ги заштити животите на граѓаните, да мотивира вакцинација и да имаме мотивирани здравствени работници кои посветено го сочувуваат здравјето на граѓаните“, рече Заев.