ЕУ прави напори да се започне со преговорите за членство во поглавјата 23 и 24. Мандатарот Зоран Заев во Брисел изрази оптимизам за перспективите на Македонија во ЕУ.
“Охрабрен сум за перспективите на нашата земја и земјите од регионот. Зборувавме за потребата од посилно фокусирање на ЕУ кон Западен Балкан што е за нас обврска повеќе за спроведување на реформите и исполнување на обврските за членство во ЕУ”, изјави Зоран Заев по средбата со Високата претставничка на ЕУ, Федерика Могерини.
На прашањето на НОВА дали може да се очекува брзо започнување на преговорите за членство во поглавјата 23 и 24 кои се однесуваат на правосудството и владеење на правото, Заев изрази верување дека е можно да се отпочне на некоја форма на вакви разговори.
“Се прават напори во институциите на ЕУ да се отворат аспекти макар и технички како преговори за да се поддржат реформите во правосудството и безбедносните структури што е многу важно за имплементацијата на препораките на Прибе како и оние кои произлегуваат од годишните извештаи на Европската комисија”, изјави мандатарот Зоран Заев.
На средбата со премиерите од земјите од Западен Балкан се разговарало за унапредување на соработката во регионот. “Веруваме во овие пораки кои беа вечерва испратени од ЕУ кои се значајно охрабрување на граѓаните од целиот регион.
ЕУ има причини повеќе за интеграцијата на Западниот Балкан што е за нас обврска повеќе да им дадеме и наша причина европските институции да ја исполнат таа своја заложба, изјави Зоран Заев.
Според изјавите по средбата овој формат на состаноци на премиерите од регионот со Високата претставничка на ЕУ ќе се одржуваат и во иднина.
-Лидерите од регионот изразија целосна подготвеност да се посветат на интеграциските процеси на ЕУ како што беше потврдено од Европскиот Совет во март 2017 година. Тие ја нагласија својата решителност за зацврстување на соработката и создавање на конкретни резултати за граѓаните во регионот. Беше потенцирана нивната заложба за добрососедска соработка и продлабочување на меѓусебното разбирање преку взаемна почит и соработка. Високата претставничка ги охрабри шестмината премиери да ја забрзаат неопходната работа за да се исполнат очекувањата на граѓаните за приближување кон ЕУ, се вели во соопштението од Кабинетот на Могерини.