Собранието на Република Македонија ја започна 61. седница на која на дневен ред e Предлогот за пристапување кон измена на Уставот на Република Македонија со насоки за негово изменување и дополнување поднесен од Владата.
Премиерот Зоран Заев во говорот во Собранието понуди помирување за настаните од 27 април, за како што рече да се обединат двете страни, но директно не го спомена зборот амнестија.
„Десната страна нека понуди рака на левата страна во Собранието. Дајте да се помириме за 27 април. Јас сум подготвен за ова да платам политичка цена. Нема иднина ако ние сами не си простиме. Оваа одлука ја очекуваат сите граѓани на Македонија. Да и покажеме на Европа дека имаме заеднички интерес“, кажа Заев.
Тој ги повика пратениците оние кои се уште се двоумат да изберат ЕУ и НАТО, наместо изолацијата.
„Сите знаеме дека единствениот пат за Македонија е во ЕУ и НАТО, сите знаеме дека оваа шанса не смее да ја пропуштиме. Таа е во согласност со одлуката на народот кој сака членство во ЕУ и НАТО“, кажа Заев кој додаде дека ова е единствениот пат за мир, стабилност и економски просперитет.
Според него, нивната историска улога и одлука ја очекуваат сите граѓани и сите во светот, рече Заев.
Владата е подготвена да биде максимално подготвена за прифаќање на амандмани, но да бидат во духот на договорот од Преспа.
Илија Димовски од ВМРО-ДПМНЕ пред гласањето за дневниот ред побара точката да биде симната од дневен ред.
-Нема легитимитет Собранието да влезе во оваа процедура, рече Димовски. „Никој не даде ветување за промена на Уставот. ВМРО ДПМНЕ во својата програма напиша дека нема да прифати промена на Уставот со цел промена на уставното име. И СДСМ ветуваше дека нема да се согласи со промена на Уставот, рече тој.
Според Димовски Собранието е должно да ја спроведе одлуката од референдумот кој бил неуспешен.
Предлогот на Димовски да се тргне точката од дневниот ред не беше усвоен. Против гласаа 69 пратеници, а за беа 39 пратеници.
Во салата се пратениците од сите пратенички групи, а на седницата присуствува и министерот за надворешни работи Никола Димитров.