Премиерот Зоран Заев од трибина во општина Карпош рече дека ја примил пораката од незадоволните граѓани кои вчера одлучија да останат дома. Тој најави чистка на сите функционери кои ги изневериле граѓаните.
„Пораката ја примив и Ви возвраќам – чистка ќе има на сите функционери кои немаат капацитет да му служат на народот. На граѓанинот мора да му се јавите, да му одговорите, да му дадете совет и да му помогнете. Ако не можете денес, ќе кажете кога можете да му ја завршите работа. Пораката е примена, но немојте да ја казнувате државата поради слабости на централната и на локалната власт“, кажа Заев.
И претседателскиот кандидат Стево Пендаровски им се обрати на граѓаните кои не гласаа во првиот круг и им порача дека ова се избори во кои се нудат два различни концепти од кои еден е интеграциски а другиот ја урива внатрешната кохезија, не ги третира сите заедници подеднакво и ја одалечува земјата од ЕУ и од НАТО.
„Последната шанса е 5 мај, кога треба да гласаме не за Стево, туку за потврда на една политичка филозофија која ја води земјата напред. Да не се разбудиме на шести, изненадени дека се вратил „груевизмот“, рече Пендаровски.
На трибината зборуваше и потпретседателот на СДСМ, Радмила Шеќеринска која исто како и Заев им порача на граѓаните дека СДСМ ќе ги коригира грешките кои го предизвикуваат нивното незадоволство.
„Ја чувме пораката на тие што останаа дома, чувме дека имаат повисоки очекувања, дека тоа што е сработено не е доволно, дека сакаат да видат решенија не само за големите државни прашања, туку и за овој плочник, за секое училиште, за секое министерство, здравствен дом, за секој шалтер. И ние сакавме да бидеме побрзи и поефикасни, но размислите со кого се требаше да седнеме на маса и да разговараме а не сакаваме ниту да ги погледнеме, од кого се требаше да побараме глас, зашто тој глас беше потребен за државата. Покажавме дека не сме себични, туку не водеше идејата да ја поведеме земјата на вистинскиот пат и затоа не е апсолутно сеедно кој ќе победи на 5 мај, туку треба да го завршиме, тоа што го започнавме.
Шеќеринска се осврна и на обвинувањата од Силјановска кон Пендаровски.
„Противкандидатката го обвини Стево дека бил продукт на транзицијата и внимавајте, обвинува министер кој сам си делел фришопови. Замислете, Силјаноска зборува за правда и дека ќе стави крај на криминалот седната во златната фотеља во Белата палата“ кажа Шеќеринска.