Премиерот Зоран Заев ја обвини претходната Влада дека е виновна за ситуацијата во Фени и за долговите кои биле од 50 милиони евра. На пратеничко прашање од Зоран Илиоски од ВМРО ДПМНЕ, Заев кажа дека кога тие дошле на власт фабриката била пред стечај.
„Во ваше време некој го покривал работењето во Фени кога биле испумпани во странство повеќе од 50 милиони евра – некој замижувал бидејќи две години фирмата немаше поднесено завршна сметка. Ние го понудивме Фени за една евро и долговите да се исплаќаат во наредните 10 години, но никој не беше заинтересиран. Поранешен министер и поранешен директор на УБК биле главни за рудата од Албанија и поради тоа се овие последици“, кажа Заев.
Во меѓувреме биле исплатени долговите кон банките и другите доверители и фабриката работи, додаде премиерот.
И вицепремиерот за економски прашања Кочо Анѓушев ја коментираше ситуацијата во Фени по најавите од Транспаренси Интернешнл дека ќе поднесат кривични пријави за стечајната постапка која била нетранспаретна, а ќе се разгледува и претставката поднесена од „Кунико“ со која се бара да се утврди какво било влијанието на Анѓушев во стечајот на Фени.
„Ги охрабрувам да одат подлабоко во испитувањата и да ги видат сите постапки на транспарентност кои биле од самиот почеток на создавањето на проблемот до денеска. Малку сум загрижен што обвинувањата кои стигнале до Транспаренси Интернешенал доаѓаат од Кунико, тие кои што го створиле проблемот, но посакувам да се оди длабоко во испитувањата“ кажа Анѓушев.
Транспаренси Интернешенал – Македонија поднесе кривична пријава против стечајниот управник на ФЕНИ, Мирослав Анастасиевски и стечајната судијка Валентина Ѓоргиевска за злоупотреба на службената положба и овластувастувања.
Од пред една недела, фирмата „Глобал Спешал Опортјунитис ЛТД“ регистрирана на Бахамите е меѓу доверителите на ФЕНИ. Промената во Централниот регистер била направена на 17 април, и во неа освен фирмата од Бахами, за членови на Одборот на доверители во отворената стечајна постапка се именуваат и Цементарница УСЈЕ Скопје и ТАВ Македонија, а се разрешуваат досегашните доверители: Комерцијална Банка, Стопанска Банка и МЕПСО АД Скопје.