Премиерот Зоран Заев е оптимист дека ќе успее да го обезбеди потребното мнозинство во Собранието на пред финалното гласање на уставните измени неопходни за имплементација на Договорот од Преспа иако вели дека поддршката со број на пратеници ќе се знае на чинот на гласањето.
Заев деновиве има средби со лидерите на албанските опозициски партии „Беса“ и „Алијанса на Албанците“ кои единствено поднесоа амандмани на уставните амандмани во предвидениот законски рок, а опозициската ВМРО-ДПМНЕ најави дека нема да учествува во измените.
-Двете опозициски партии од албанскиот блок досега беа конструктивни во однос на процесот на уставни измени. Дел од нивните сугестии се вградени. Сите политички партии силно го поддржуваме процесот на евро и евроатланските интеграции, но со нив ќе разговараме и за оние работи за кои имаат резерви, порача македонскиот премиер.
По вчерашната средба со претседателот на опозициската „Беса“, Билал Касами, информираа од владината прес-служба, било договорено да се одржи уште еден состанок, најдоцна до вторник, на работна група составена од претставник од Кабинетот на претседателот на Владата, како овластен предлагач на уставните амандмани и на уставниот закон и претставници од раководството и пратениците од „Беса”, за да се разгледаат детално предлозите и да се дефинираат конечните позиции.
Ставот на БЕСА е дека тие се за влез во НАТО и ЕУ но за да ги имаат гласовите на нивните пратеници, Владата и Собранието мора да прифати измени и во самиот Устав и преамбулата. Партијата бара, покрај официјализирање на албанскиот јазик како официјален на целата територија на Македонија,зборот македонско во делот за државјанството да се замени со зборот граѓани и место “македонско/граѓанин на Република Северна Македонија” да стои само граѓанин на Република Северна Македонија.
Премиерот Заев го чека уште една средба, со претседателот на Алијанса на Албанците, Зијадин Села, кој исто така поднесе амандмани во последната фаза од имплементацијата на Преспанскиот договор, слични како оние на Беса. Без подршка од пратениците на Беса и Алијанса на Албанците во Собранието нема 80 пратеници колку што се потребни за да уставните амандмани бидат изгласани.
Третата и последна фаза од имплементацијата на Преспанскиот договор започнува следната недела на 9 јануари кога е закажана седница на Собранието на Република Мкедонија за усвојување на уставните измени. За да помине текстот на амандманите на Уставот предложен од Владата треба да биде поддржан од најмалку две третини од пратениците во законодавниот дом или од 80 пратеници. Потоа топката се префла во Грција, а премиерот Заев верува во зборот на неговиот грчки колега Ципрас, дека има парламентарно мнозинство за да се ратификува Договорот од Преспа.