Премиерот Зоран Заев денеска изјави дека целиот фокус на Владата е кон Бугарија со сите бугарски институции, пред сѐ претседателот на Бугарија, Румен Радев, но и со премиерот Стефан Јанев и министерот за надворешни работи. Владата се надева дека во јуни навистина тие ќе дадат поддршка за следниот чекор во интегративните процеси на Македонија.
Наредната недела Заев за првпат треба да се сретне со бугарскиот технички премиер Јанев и тоа на граничниот премин Деве Баир каде од Бугарија треба да бидат донирани 50 илјади вакцини против Ковид – 19.
– Пред два дена се слушнав со премиерот Јанев и договоривме следни комуникации. Овие денови, како што објави претседателот на Бугарија, тие сепак го прават гестот на пријателство. Следната очекуваме недела да направиме прва средба на граничниот премин, барем како што е најавено, рече Заев.
Според него, кабинетите сѐ уште договараат и допрва треба да се види дали преку Црвениот крст на Бугарија на Македонија ќе бидат донирани 50 илајди вакцини.
Оваа средба ќе биде искористена за да се договори следна на која ќе се дискутира да се отстранат пречките за првата меѓувладина конференција со Европската комисија. Заев се надева дека ќе дадат резултати овие обновени конекции со Бугарија.
Заев вели „Бугарија мора да докаже дека е рационална и мора да се најде решение во името на двата народа и на новите генерации“.