Максим тргна против Максим – вака претседателот на СДСМ, Зоран Заев ја искоментира одлуката на актулениот кумановски градоначалник Димитриевски да настапи како независен кандидат на претстојните локални избори. Неодамна генералниот секретар на партијата, Љупчо Николовски најави дека Максим Димитриевски ќе биде исклучен од партијата, а денеска Заев дополни дека ваквото решение на партијата треба да биде потврдено на седница на Централниот одбор на СДСМ.
-Статутот не е од сега направен. Однапред се познати правилата. Статусот е јасно достапен, претпоследниот е изменет со Етички кодекс каде се даваат сите права и слободи, но и одговорности. СДСМ е исклучително демократска партија, која своите одлуки не ги носи врз основа на ставови на поединци. Таму е јасно дека ако се спротивставите на СДСМ, не можете да бидете член на СДСМ. Инаку може да се изразува незадоволство и спротивставени ставови, дури и ако тие не се согласуваат со оние на највисокото раководство, рече Заев.
Максим Димитриевски вчера изрази незадоволство од најавата дека ќе биде исклучен од партијата, велејќи дека таквата одлука е нелегитимна.
-Длабоко сум разочаран и искрено жалам за таквата, би рекол шверцерска, полноќна одлука на поединци на раководството на мое СДСМ. Дури ни таквата одлука не е легитимна, затоа што не е согласно статутот на СДСМ. Одлуката за исклучување се носи на седница на Извршниот одбор, па потоа на седница на Централниот одбор на партијата. Моите информации велат дека такви седници не се одржале, соопшти вчера Димитриевски.
Откако Димитриевски најави дека ќе собира потписи за независна кандидатура, од Бихаќка нагласија дека тој и свртел грб на партијата и порачаа дека Куманово ќе остане бастион на СДСМ.
-Во Куманово ќе победи тој кој триесет години по ред победувал, а тоа е Социјалдемократскиот сојуз. Не доминирала никогаш личноста, туку социјалдемократијата била водечка нишка. Оливер Илиевски е секретар на СДСМ Куманово и имаме шанса уште во првиот круг да ја однесеме победата, кажа Заев одговорајќи на новинарски прашања.