Можни се промени во повеќе владини ресори, но може да се случи и никој да не се менува. Тоа ќе зависи од резултатите на разговорите за проширување на владината коалиција кои се во тек, изјави денеска премиерот Зоран Заев.
„Течат во континуитет разговорите за проширување на владината коалиција и сакам да успее овој процес онака колку што постои подготвеност од двете страни, односно од помалите опозициони партии со кои преговарам и од нашата владејачката страна, рече Заев и додаде дека главна причина за реконструкцијата е зголемување на парламентарното мнозинство но и резултатите од работењето.
„ Сакам во самите институции, за кои и паралелно правам анализа, да ги видам резултатите од промената на власта. Сакам да знам што тоа се променило на подобро. Тоа се важните критериуми. Штом ќе имам нешто ново ќе го споделам со јавноста“ рече Заев.
Тој не сакаше конкретно да каже во кои ресори може да се очекуваат смени се додека нема конечна одлука за тоа.
Пред извесно време Заев најави дека по првомајските празници треба да се очекува да финишираат разговорите за владината реконструкција.