Во новиот совет задолжен за имплементација на веќе донесената стратегија за реформи во правосуството треба да има практичари, посочи премиерот Зоран Заев кој ќе биде на чело на новото тело.
– Веројатно во него ќе влезе претседателот на Врховниот суд, претседателот на Осовниот суд Скопје 1, јавниот обвинител, специјалниот јавен обвинител, една од апелациските единици, претставници од Здружението на судии, Адвокатската комора, кои треба да бидат помогнати од граѓански активисти или експерти и од експерти од професорската фела. Тоа тело не треба да биде преобемно за да биде со сериозен импакт, да ги забрза процесите и да биде консултативно за практичарите кои ќе ги изработуваат законските решенија, рече Заев одговарајќи на прашање по завршетокот на рочиштето за „Поткуп“.
На прашањето, што може да го советува Јово Вангеловски претседател на Врховен суд, кој „со одлуките овозможи бегство на лица поврзани со Специјалното јавно обвинителство“, Заев рече дека не се водиат од името и презимето на личностите коишто ги водат институциите и „Врховниот суд во еден ваков совет не смее да биде незастапен“.
-Верувам дека играјќи со позициите, на крајот треба да има коректив и внатре и ова треба да ги даде најдобрите можни решенија во интерес на граѓаните и на правосудството во Македонија, рече Заев.
Законот за амнестија, нагласи, се носи бидејќи се очекува правда и правичност за многу луѓе кои беа осудени во процеси во поранешни закони за кои новите законски решенија ги ублажија казните, а воедно ќе овозможи и модернизација на затворските простории.
Како пример го посочи Законот за транспорт на мигранти, според кој, како што кажа, имаше пресуди по осум и 10 години затвор, а по промената на законското решение се дозволуваше да се транспортираат мигранти од јужната до северната граница дури и со такси и автобуски превоз.
– Имаше јавна дебата и се надевам дека донесовме исправно решение. Верувам дека се донесе правично решение за сите, а делата за полов напад, педофилство, убиство или слично не се амнестираат никаде во светот. Со Законот за амнестија ќе овозможиме и модернизација на затворските простори, рече Заев.
Нагласи дека капацитетот на најголемата затворска установа „Идризово“ е 850, а во моментво таму има преку 2.000 затвореници.
– Тие не може да се преместуваат за да се реконстурираат одредени простории, посочи Заев.