Пациентот е донесен со возило на Брза помош од рудникот Бучим во Клиничката болница во Штип и бил веднаш повикан дежурен анестезиолог кој констатирал дека пациентот е починат, изјави Марина Шуманска, портпарол на штипската Клиничка болница.
Се уште трае увидот по несреќата во рудникот „Бучим“ во Радовиш, во кој денеска загинаа двајца радовишани, членови на Алпинистичкиот клуб „Плоча“. На двајцата, кои биле искусни планинари, како што ни потврдија во клубот, ова не им бил прв ваков ангажман – чистење високо недостапни силоси, но како се случила оваа трагедија се очекува да открие истрагата.
Како што за НоваТВ изјавуваат од Клиничката болница во Штип, таму, за жал, само ја констатирале смртта на едниот од загинатите.
– Пациентот е донесен со возило на Брза помош од рудникот Бучим во Клиничката болница во Штип и бил веднаш повикан дежурен анестезиолог кој констатирал дека пациентот е починат, изјави Марина Шуманска, портпарол на штипската Клиничка болница.
И вториот радовишанец им подлегнал на повредите на пат кон радовишката болница.
Повеќе детали за оваа несреќа се најавуваат за подоцна, велат од МВР.
Како што претходно веќе објавивме, во официјалната изјава на рудникот „Бучим” стои дека во работната единица флотација се случил несреќен случај, при што две лица се починати.
– Починатите лица се подизведувачи од Алпинистички клуб „Плоча“-Радовиш, ангажирани за извршување работни задачи-чистење на високо недостапни силоси. На местото на несреќата медицинскиот персонал на „Бучим“ веднаш ги презеде сите неопходни мерки за укажување на прва помош и настраданите лица се упатени кон ЈЗУ Здравствен Дом – Радовиш и ЈЗУ Клиничка болница – Штип, каде што е констатирана смрт, информираат од рудникот.
(Љ.Б.)