Министерството за надворешни работи пред малку потврди дека во сообраќајната несреќа во Италија загинале З.С. (33 години) од Македонска Каменица, А.К. (31 година) од селото Саса, како и В.И. (30 години) од село Пекљани, Виничко.
Сообраќајката се случила во градот Ница Монферато, во италијанската провинција Асти, дел од регионот Пиемонт, при што загинал и италијанскиот државјанин кој управувал со возилото со кое се судриле несреќните луѓе.
„Амбасадата во Рим, како и Генералниот конзулат во Венеција се во директен контакт со надлежните институции на Италија, од каде е добиена усна потврда за починатите наши државјани, како и за нивните податоци. Се работи за З.С. – 33 години од Македонска Каменица, А.К. – 31 година од селото Саса, како и В.И. – 30 години од село Пекљани, Виничко“, соопшти македонското МНР.
Претставниците на конзулатот и амбасадата веќе се во контакт со дел од семејствата на починатите, и ќе бидат на располагање за помош во врска со преносот на телата од Италија.
Иако поради велигденските празници комуникацијата со италијанските служби се одвива забавено, нашите дипломатски претставништва остануваат во комуникација со цел прибирање дополнителни информации за деталите околу сообраќајната несреќа, податоци за починатите, како и во делот на обезбедување писмена потврда за сите детали од несреќата.
На располагање се дежурните телефони на: генералниот конзулат во Венеција +39 327 935 1698, амбасадата во Рим +39 351 336 3919, како и СОС телефонот на Министерството за надворешни работи 075 273 732.