Денеска треба да почне увидот во состојбата на кавадаречкиот комбинат Фени индустри од страна на три компании од Европа кои се заинтересирани за вложувања во овој индустриски комплекс. Трите банки доверители, Комерцијална, Стопанска и Силк роуд банка, на кои Фени им должи 40 милиони евра, очекуваат увидот во имотот да заврши без проблеми.
Енекод, бугарската компанија која веќе е влезена во Фени, по отворањето на стечајната постапка не обезбедува струја за работа на печките, па за електрична енергија, мазут и други трошоци во последните две недели банките платиле 250.000 евра.
Во моментов Фени е раководена од луѓе на бугарската компанија која тврди дека е новиот сопственик на комбинатот, па не е јасно дали денеска ќе почне увидот на барање на банките. Стечајниот управник Мирослав Атанасиевски вели дека никој не може да го спречи увидот кој се планира да трае до 29 ноември за кога е закажано ново рочиште во судот во Велес.
„Менаџерскиот тим на Фени индустри АД Кавадарци знае за барањето на доверителите. Непостапувањето или одлагањето на постапувањето е спротивно на Законот за стечај и ќе се смета за несоработка, за што, согласно законските прописи, менаџментот сноси одговорност“, вели Атанасиевски, привремен стечаен управник
На вработените не им се исплатени две плати и не се знае кога работниците ќе си ги добијат парите, коментираат доверителите. Во меѓувреме истечено било и осигурувањето на имотот на фабриката, за што е предвидена кривична одговорност. Осигурување немало ни за вработените, а концентрат кој е неопходен за работа на комбинатот стоел на пристаништетото во Солун, за чија лежарина треба да се плаќа по 1.200 евра дневно.
Банкарите велат дека имаат сериозни инвеститори за комбинатот да го спасат од стечај, но не ја исклучуваат можноста за преговори и со Енекод само ако покаже план за отплата на долгот, за обрт на средства и за вложувања. Од сите инвеститори го бараме истото, оној што ќе има најдобра понуда, ќе ја добие фабриката, велат претставници на трите банки. За нив Енекод засега противправно се претставува како сопственик на фабриката во која нема инвестирано ниту еден долар.
Новото рочиште за разгледување на можноста за отворање стечај за Фени е закажано за 29 ноември во Основниот суд во Велес. Банките кредитори на Фени иницираа отворање стечај поради долг кон нив од 40 милиони евра и уште 20 милиони евра кон други доверители. Првото рочиште во понеделникот минатата недела беше одложено на барање на новиот директор на фабриката, Рајчо Кацаров, кој во исто време е директор и на бугарски Енекод, заинтересиран да ја купи фабриката. Тој побара изземање на судот во Велес за судењето да биде во некој скопски суд оти банките биле од Скопје, но Врховниот суд му го отфрли барањето и предметот повторно го врати во судот во Велес.
Фени има и 5,5 милиони евра долг кон Управата за јавни приходи.