Комисијата за европски прашања на Собранието на Република Македонија, со која претседава пратеникот Артан Груби, го заврши општиот претрес по Законот за употреба на јазиците, во прво читање, по што Комисијата со 9 гласа „ЗА“, и ниту еден глас „ПРОТИВ“ и „ВОЗДРЖАН“ го усвои заклучокот дека законот е прифатлив, и од аспект на неговата усогласеност со правото на ЕУ, и треба да се даде на натамошно читање.
Груби во своето воведно обраќање рече дека е важно носењето на овој закон за заокружување на нормативниот дел кој што произлегувал од Охридскиот Рамковен Договор и од Амандманот 5 од Уставот на Република Македонија.
Комисијата, како матично работно тело по законот, кој е со знамето на Европската унија и е дел од Националната програма за усогласување на правото со ЕУ за 2017-2020 година, ја започна расправата по законот во вторникот, која продолжи во средата и заврши денес, согласно деловничките одредби на Собранието на Република Македонија, кои предвидуваат општиот претсрес по законот во прво читање да заврши најмногу во рамките на три работни дена.
Во текот на тридневната расправа во Комисијата, пратаниците Антонио Милошоски, Џеват Адеми, Илија Димовски, Стево Пендаровски, Мирсада Емини, Весел Мемеди, Реџаил Исмаили, Владанка Авировиќ, Петре Шилегов, Невенка Стаменковска, Нола Исмајлоска, Жаклина Пешевска, Трајчо Димков, Зекир Рачмиловиќ, Шпреса Хадри, Димитар Стевананџија, Фадил Зендели, Томислав Тунтев имаа свои говори.