Оле Гунар Солскјер е нов предводник на Манчестер јунајтед. Норвежанецот ќе биде на клупата на „црвените ѓаволи“ до крајот на сезоната, соопшти клубот од „Олд Трафорд“, и ќе дебитира веќе во сабота (18.30 ч.) против Кардиф во меч од 18. коло во Премиерлигата. „Убиецот со детско лице“ го презема кормилото од Жозе Мурињо кој доби отказ по поразот од Ливерпул во неделата.
„Манчестер јунајтед е во моето срце. Чувството е фантастично што се враќам во нова улога. Се радувам на работата со тимот и со сите во клубот “, изјави досегашниот тренер на Молде кој веќе го предводеше резервниот тим на Манчестер јунајтед.
Солскјер беше член на Манчестер јунајтед од 1996 година до 2007 година. Во тој период одигра 366 меча пришто постигна 126 гола од највреден е оној против Баерн Минхен во третата минута од судиското екстра време за победа во финалето во Лигата на шампиони во 1999 година. Негови асистенти во стручниот штаб ќе бидат Мајкл Филан, Мајкл Керик и Кирон Мекен.