https://www.youtube.com/watch?v=eIhnExkVzPU
Заменик државниот секретар на САД Џон Саливан кој денеска е во посета на Македонија, ја пренесе силната американска поддршка за Договорот од Преспа кој го отвора патот на Македонија да го заземе заслуженото место во ЕУ и НАТО, изјави тој на заедничката прес-конференција со македонскиот премиер Зоран Заев.
-САД се залагаат за стабилна и безбедна Југоистона Европа, а Македонија е клучен фактор во регионот за постигнување на таа цел, порача Саливан.
Тој искажа пофалби за премиерот Заев и за шефот на дипломатијата Никола Димитров, како и за пратениците кои ги поддржаа уставните измени. Ги повика и другите парламентарци да дадат поддршка и да ги тргнат настрана теснопартиските цели и да ги следат националните интереси.
– Вашите гласови ја ставија вашата земја на патотот на сигурна и просперитетна иднина. Како продолжува процесот во Собранието ги поттикнуваме повеќе пратенции да ги остават на страна партиските интереси и да останат фокусирани на заедничките стратешки цели. Нема друга алтернитава, надежите за посветла иднина за вашата земја ви се на дофат, истакна Саливан.
На прашањето какви се ризиците Преспанскиот договор да не биде ратификуван во грчкиот Парламент, Саливан рече дека тоа е спогодба постигната од страна на двајца храбри лидери на двете земји и САД цврсто веруваат во спроведувањето на договорот.
Саливан потсети дека државниот секретар на САД Мајк Помпео пред неколку дена се сретна со грчка делегација, во рамки на стратешкото партнерство меѓу САД и Грција, при што ја нагласил важноста од спроведувањето на Спогодбата за двете земји, како за Македонија така и за Грција.
– Спроведувањето на оваа спогодба е важно за просперитетот на двете земји, за Грција и за Македонија. Двајцата премиери покажаа храбро лидерство и САД се горди на ваква спогодба што е постигната меѓу двете земји. И понатаму ќе продолжиме да го поддржуваме спроведувањето на спогодбата и тоа е една од причините за мојата посета на Скопје, рече Саливан.
Во однос на целосното спроведување на Договорот од Преспа, и дали има и минимален ризик да не успее тој процес, Заев рече дека најсериозна гаранција за успешноста на процесот е неговата инклузивност, преку која активно учество земаат огромен број на пратеници, а не само осумте пратеници од новата пратеничка група на ВМРО-ДПМНЕ.
– Ова беше потврдено уште при самата дебата за утврдување на потебата за отворањето на уставните измени, каде што беа вградени сугестиите на осумте пратеници, во втората фаза исто така кога се зборуваше за нацрт-амандманите, и во оваа трета фаза излеговме со амандмани во кои буквално е вградено се што беше во духот на договорот, што беше предложено и од македонските партии и од албанските политички партии. Тоа е најсериозната гаранција за имплементација на договорот, рече Заев.
Премиерот истакна дека успешната завршница на овој процес во Собранието е билетот на Македонија за влез во НАТО.
– Паралелно со овој процес нам ни останува да продолжиме со реформите во правосудството, безбедносните служби и јавната администрација. Мораме да бидме сигурни дека до средината на наредната година, на Европската комисија во Брисел ќе испорачаме кредибилни резултати за да се потврди одлуката на советот на ЕУ, рече Заев.
Премиерот Заев оцени дека посетата на заменик државниот секретар е уште еден доказ за постојаната и континуирана поддршка на САД на Република Македонија.
Заев нагласи дека главните стратешки цели на Македонија остануваат членство во ЕУ и НАТО. Порачна дека Македонија е посветена на регионалната соработка и се залага за силен и стабилен Балкан со поддршка на ЕУ и САД.
Тој додаде дека Владата останува посветени на реформите за да се испорачаат кредибилни резултати и да се потврди одлуката за отворање на преговорите за членство на Македонија во ЕУ.
На новинарско прашање, дали можеби гледа руско влијание во честите непријателски изјави кон Македонија во последно време, Саливан рече дека не е тајна и не е изненадување за никого дека Русија се противи и на Преспанскито договор и на членството на Македонија во НАТО.
-Горд сум што сум тука како претставник на САД и на американскиот народ, во поддршката на одлуката што ја донесоа политичките лидери и граѓаните на оваа Македонија. Тука сме да ја поддржиме одлуката донесена под храброто лидерство. Не е непознато дека Русија се противи на Преспанскиот договор и нема сомнеж дека ќе направи се во сопствен интерес наспроти интересот на македонските граѓани, да го поткопа процесот на спроведување на Договорот. Но САД ја поддржуваат Макодонија и легитимната и демократска одлука. Руското влијание е видливо и во други делови на светот, како и во избрите во САД во 2016. Ќе ги поддржиме сите влади во разоткривање на сите сите активности со кои Русија се обидува да го поткопа процесот, рече Саливан.
Саливан кој престојува во еднодневна посета на Македонија, треба да има средби и со претседателот Ѓорге Иванов, со претседателот на Собранието Талат Џафери и со координаторите на пратеничките групи. Тој веќе се сретна со министерот за надворешни работи Никола Димитров, на која Саливан истакнал дека целта на неговата посета е да ја реафирмира американската поддршка на историскиот пат на интеграцијата на Република Македонија кон ЕУ и НАТО.
Посетата на заменик-државниот секретар на Македонија е во рамки на неговата турнејата низ повеќе европски земји.
Саливан е највисок функционер на Стејт департментот кој од 2001 година доаѓа во официјална посета на Македонија.