Во акцијата на финансиската полиција која денеска се спроведе на 13 локации во Скопје и околните места, запленет е 12 тони тутун кој бил нелегално увезен во земјава, а потоа преработуван и продаван без да се плати акциза.
„Акцијата се спроведе врз основа на сознанија дека група на правни и физички вршат увоз на тутун од странство од сортата „вирџинија“ која се разликува од произведениот домашниот тутун и по квалитетот и по големина на листот и истиот не е дозволен да се произведува на територијата на нашата држава. Непреработениот тутун во лист се дистрибуирал на повеќе локации каде имало нелегални машини со кои се сечел, режел или на друг начин се преработувал со што станувал акцизна стока за што треба да се плати акциза“рече директорот на Финансиската полиција Арафат Муареми.
Тутунот бил нелегално увезен од повеќе правни фирми во 2018 и 2019 година од Албанија, Србија, Бугарија и Грција кои потоа го дистриубирале и продавала на физички лица на црно на неколку локации во Скопје, кои го преработувале и продавале без акцизна бандерола на црниот пазар на повеќе локации во земјава.
„Ваквата продажба не се евидентира, со што производители се стекнуваат со противправна имотна корист без да се уплати даночната обврска, односно акцизата, рече Муареми.
Буџетот е оштетен за 7,5 милиони евра за две години. Во 2018 за 5,5 милиони евра, а во 2019 година 1,8 милиони евра.
Директорот на Царинската управа Танасоски кажа дека „резултатите од спроведената анализа на дел од примероците на тутунот покажаа присуство на пестицидот бифентрин кој е невротоксин и предизвикува иритација на кожата пореметување во енодркиниот систем“.
Тутунот дополнително содржи катран над дозволеното кој сам по себе е отровен, а од начинот на производство, евидентно е дека е подготвуван во домашни, односно примитивни услови и поради несоодвентиот начин на чување содржи мувла и микотоксини кои може да предизвикаат од акутно труење до појава на рак.
За сега повикани на разговор се 4 физички лица кои по давање исказ ќе бидат пуштени, а ниту едно правно лице кое го шверцувало тутунот не е приведено, но како што вели Муареми тие се познати на истрагата и се очекува јавен обвинител да даде налог за нивно приведување.