Во Софија започна состанокот на советодавниот Совет за национална безбедност што го свика претседателот на Бугарија, Румен Радев на тема „Улогата на Република Бугарија во проширувањето на ЕУ и во процесот на стабилизација и асоцијација: Република Северна Македонија и Албанија“.
Како што јави дописникот на МИА од Софија, претседателот на Бугарија на 16 декември во Брисел ја објави намерата да свика Советодавниот совет на кој ќе се разговара на темата Северна Македонија.
Тој пред неколку дена изјави дека Бугарија продолжува да биде отворена за дијалог со Северна Македонија. Радев повика на „гарантирање на правата на македонските Бугари, откажување од јазикот на омразата, прекин на процесите на дебугаризација, фалсификување на нашето илјадагодишно културно и историско наследство“. Според бугарскиот претседател, ова само ќе помогне во процесот на евроинтеграција, за конечно Бугарија да ја отвори вратата за преговори за членство на Република Северна Македонија со ЕУ.
Новоизбраниот премиер на Бугарија, Кирил Петков пред Народното собрание истакна дека владеачката коалиција има јасен заеднички став за Северна Македонија. Од говорницата на Народното собрание, Петков најави дека на 18 јануари оди во Скопје на разговори, покажувајќи дека добрососедството е основен принцип за односите на Бугарија со северна Македонија.
Повод за посетата на Петков на Северна Македонија е, исто така, и 30-годишнината од признавањето на независната македонска држава од страна на Бугарија.