Утринава во судот во Велес започна судскиот процес за смртта на родилката Маја Кадиева која заедно со нејзиното новородено бебе починаа за време на царскиот рез, во гевгелиската болница. За случајот се обвинети двајца гинеколози и еден анестезиолог, вториот кој беше присутен на породувањето во меѓувреме, почина.
Сопругот на починатата родилка Мите Кадиев, очекува дека судењето ќе биде правично и транспарентно.
„Очекувам дека судскиот процес брзо да заврши. Се надевам дека нема да има опструкции од страна на обвинетите за да се одолговлекува судењето. Фактите се непобитни и очекувам дека судот професионално ќе си ја заврши работата и ќе донесе правилна пресуд“, изјави Мите Кадиев, сопругот на починатата родилка.
Тројцата лекари се обвинети за кривичното дело „Тешки дела против здравјето на луѓето“.
Маја Кадиева и нејзиното бебе починаа ноќта меѓу 22 и 23 октомври минатата година во болницата во Гевгелија, при нестручно изведено породување, а истражните органи докажаа дека анестезиолозите биле пијани за време на царскиот рез.
Смртта на Кадиева настанала поради комплетен прекин на доводот на кислород и задушување, поради што се задушило и бебето во утробата на мајката, покажа извештајот од Институтот за судска медицина.