Осуденичката Костадинка А. во петокот изутрина била донесена во „Ургентниот центар“ на скопскиот клинички блок, со прснат чир и силни болки во стомакот, дознава НОВА од болнички извори. Таа веднаш била оперирана, но и три дена по операцијата се уште се наоѓа во шок соба.
Лекарски извори за НОВА, велат дека најверојатно причината што е задржана во шок соба е што била донесена со задоцнување бидејќи вообичаено пациенти со прснат чир по операцијата веднаш ги носат на одделението за абдоменална хирургија.
Директорот на Ургентниот центар, Реџеп Селмани не беше достапен официјално да ја потврди информацијата.
Според затворски извори, на Костадинка не и’ било добро уште од четвртокот, кога побарала да биде прегледана од затворскиот лекар, но тоа и било оневозможено од друга осуденичка која ги прави списоците за доктор и оценува на кој му треба, а на кој не му треба лекарска помош. На Костадинка и било речено дека не и е ништо и дека лаже, велат нашите извори.
Педестгодишната жена се вратила во соба и цел ден имала болки кои продолжиле и во текот на ноќта, но никој не викнал брза помош. Утрината Костадинка почнала да повраќа, а состојбата и се влошила. Дури откако се онесвестила, била ставена во ќебе и со придружба на командирка и друга осуденичка, откако саат време на минусни температури лежела во комбе на капија, била однесена во Ургентениот центар каде е задржана во тешка состојба на операција.