Алкалоид шести, Гамбит Асеко осми. Ова се пласмани на двата македонски претставника на годинашното издание на Европскиот клупски куп во шах во Порто Карас од каде со шампионската титула замина Медњи Всадник од Санкт Петербург над кого „фармацевтите“ славеа со 3,5:2,5 во рамки на четвртото коло.

Во мечевите од последното седмо коло, тимот на Алкалоид беше убедлив против Бер Шева од Израел со 4,5:1,5. Победи забележаа Лирен, Јангји и Јаковенко, ремизираа Андрејкин, Елјанов и Криворучко. „Фармацевтите“, освојувачи на ЕКК во 2016 година, го завршија настапот со пет триумфи, реми и пораз.

Со победа од Порто Карас се одјави и Гамбит Асеко чии шахисти во седмото коло беа подобри од претставникот на Англија, Вуд Грин со 3,5:2,5. Љубиша Андоновски, Дејан Динев и Зоран Стојчевски освоија по цел поен, Никола Николовски одигра реми со Адам Тејлор. Гамбит Асеко, за разлика од Алкалоид, забележа вкупно четири победи, два нерешени исхода и пораз.