И официјално заврши изборната камапања. Од 16 октомври почнува изборниот молк. Политичките партии и кандидатите замолчуваат, исто и медиумите кои не треба да ги пренесуваат нивните ставоти. Правилата за изборен молк траат до 19.00 часот на 17-ти октомври, односно до затворање на гласачките кутии.
За време на молкот, медиумите продолжуваат да известуваат за изборниот процес, но престануваат да ги претставуваат учесниците во изборната кампања. Според Изборниот законик, за прекршување на изборниот молк се смета емитување на било какви информации, фотографии, аудио и аудиовизуелни материјали поврзани со, или во кои учествуваат учесници во изборите, какви било облици на медиумско известување кои се отворено или прикриено во функција на нечија кампања и можат да влијаат врз одлуката на избирачите, податоци со кои се открива идентитетот на политички субјекти и/или поединци вклучени во инциденти или неправилности на денот на гласањето; како и изјави од кандидати во изборниот процес, од претставници на политички партии и од носители на функции во органите на власта.
На ден пред изборите, 16-ти октомври (сабота) своето право на глас го остваруваат затворениците (1.899 гласачи), болните и немоќните лица, како и лицата кои се во домашна изолација поради позитивен тест на Ковид – 19, но и лицата на кои им е определена мерката самоизолација.
В недела право на глас имаат 1.824.864 граѓани. Од странство ќе може да гласаат 82.461 иселеници. Локалните избори ќе се мониторираат со повеќе од 1.000 акредитирани домашни и странски набљудувачи.