Собранието попладнево ја заврши расправата во врска со предлогот за објавување оглас за именување јавен обвинител на Република Македонија, откако сите пријавени за дискусија се изјаснија.
Претседателот на Собранието Талат Џафери ја прекина седницата и најави дека пратениците дополнително ќе бидат известени за тоа кога ќе биде закажано нејзиното продолжение.
Пратениците од опозицијата и во попладневниот дел од расправата за огласот за именување државен јавен обвинител, побараа да се одложи оваа точка за после локалните избори и да се испочитува мислењето на Антикорупциска, според кое, сите постапки за разрешување и именување носители на јавни функции се ставаат во мирување до завршување на изборите.
Според нив, целата постапка, е незаконска, бидејќи како што рекоа, согласно Изборниот законик, до завршување на изборите не смее да ниту да се разрешува и ниту да се вработува.
Крсто Муковски од ВМРО-ДПМНЕ инсистираше дека целиот процес околу изборот на нов јавен обвинител се тера „на сила“, бидејќи очигледно тој ќе биде избран после изборите. Тој рече дека оваа седница се одржува во време кога се одржуваат седници на три собраниски комисии со многу важни законски решенија.
– Надлежноста за свикување седница на комисиите е на претседателите на комисиите. Мојот повик беше претседателите на комисиите да ги свикаат седниците и од понеделник имаа можност да ги свикаат седниците за стартните постапки веднаш, вклучувајќи и во текот на вчерашниот ден во кој ден немаше седница на Собранието. Тоа е сега работа за која што веројатно од колегите пратеници и претседателите на комисиите ќе треба да барате објаснување, рече Џафери.
Ставот на владејачкото мнозинство е дека не е прекршен ниту еден закон во постапка за разрешување на јавниот обвинител Марко Зврлевски. Ги потсетија колегите од опозицијата дека во 2013 година кога биле распишани избори на 11 јануари, веќе на 21 јануари, односно за десет дена, тогашната влада на ВМРО-ДПМНЕ го именувала Зврлевски за јавен обвинител и прашаа зошто тогаш не е реагирано за ова.
Марко Зврлевски беше разрешен од функцијата на 17 август на предлог на Владата бидејќи, како што објаснија, тој ненавремено, незаконито и недоволно стручно ја извршувал функцијата. За в.д. јавна обвинителка е избрана Лилјана Спасовска.
Меѓу другите точки на оваа седница и Предлог одлуката за утврдување на бројот на потпретседатели на Собранието. Владејачкото мнозинство го поддржа предлогот на опозицијата на дневен ред, по скратена постапка да бидат ставени три нивни закони.
По скратена постапка ќе се носи пакет закони предложен од владејачкото мнзоинство. Овие три закони предвидуваат минималната плата да биде 12.000, надоместок за одредена група стечајци и укинување на радиодифузната такса, предложени од владејачкото мнозинство.
Владата предложи по скратена постапка да се носат и измените на Законот за медицинските студии и континуираното стручно усовршување на докторите на медицина со којшто, како што меѓу другото кажа министерот за здравство Арбен Таравари, предвидува болниците да одлучуваат кој доктор ќе оди на доусовршување во странство, а не како досега министерот за здравство.