Бурната изборна сезона која повторно ги поттикна силните политички поделби во Америка и покрена прашања за нејзината посветеност на демократска иднина завршува денеска, додека гласачите гласаат на првите национални избори во време на мандатот на Бајден.
Демократите се подготвуваат за разочарувачки резултати, и губење на контролата врз Претставничкиот дом и врз Сенатот.
Враќајќи се во Белата куќа синоќа по неговиот последен настан во кампањата, Бајден рече дека смета оти Демократите ќе го задржат Сенатот, но призна дека ќе биде тешко за Претставничкиот дом.
Републиканската партија е, пак, оптимист, сигурна дека пораките фокусирани на економијата, цените на бензинот и криминалот ќе „запалат“ кај гласачите во време на зголемена инфлација и зголемено насилство.
Резултатите би можеле да имаат големо влијание врз последните две години од претседателствувањето на Бајден. Контролата на Републиканците дури и на еден дом на Конгресот би го оставила Бајден ранлив на голем број истраги за неговото семејство и администрацијата, за пакетот за здравствена заштита и социјални трошоци. Осилената Републиканска партија, исто така, може да го отежне подигањето на плафонот на долгот и да ја блокира дополнителната поддршка за Украина во војната со Русија.
Доколку Републиканците остварат добар резултат тоа може да создаде притисок врз Бајден да не оди на реизбор во 2024 година. Некои кои учествуваа или беа во близина на нападот на Капитол Хил на 6 јануари, е можно повторно да се вратат по денешните избори. Голем број кандидати на Републиканската партија за државен секретар, вклучително и оние кои се кандидираа во Аризона, Невада и Мичиген, одбија да ги прифатат резултатите од претседателските избори во 2020 година. Доколку победат денеска, тие би ги менаџирале идните избори во државите кои често се клучни во претседателските натпревари.
Ситуацијата особено се комплицира со падот на популарноста на Бајден, што предизвика многу Демократи да не сакаат да се појават со него во трката со конкурентите. Само 43 отсто во САД сметаат дека Бајден успешно се справува со својата работа како претседател, а само 25 отсто сметаат дека земјата оди во вистинската насока.
Извор: Асошиетед Прес