Претседателот на Судскиот совет, Киро Здравев, по пишувањата на Нова ТВ дека судски предмети се чуваат со години во фиоките на разрешениот претседател на Врховниот суд, Јово Вангеловски, денеска изјави дека за тоа е известено Основното јавно Обвинителство. Во врска со предметите, тој рече дека на странките им се повредени правата на итно постапување, односно постапување во согласност со принципот за судење во разумен рок и додаде дека в.д. претседателот на Врховниот суд, Фаик Арслани треба да каже дали предметите се задржани основано или не.
„Добивме информација од в.д. претседателот на Врховниот суд дека се пронајдени предмети и дека ги има распределено на седница на Оддел за кривични дела кај судиите кои работат во тој оддел. Паралелно и ние ќе преземеме чекори. Тоа веќе го пуштивме во процедура, но ние не можеме да преземаме конкретни мерки. Затоа истовремено ја известивме Антикорупциската комисија и Јавниот обвинител, бидејќи сметаме дека Антикорупциска можеби ќе најде нешто што е во нејзина надлежност“, рече Здравев.
Очекуваме, потенцира Здравев, прво тоа да го направи в.д. претседателот на Врховниот суд, како што е ред, во спротивно ќе преземеме конкретни мерки за поднесување на барање за утврдување на одговорност за поранешниот претседател на Врховниот суд, Јово Вангеловски.
За време на промоцијата на иницијативата „Отворено судство“ која е дел од програмата „Подобрување на транспарентноста, правната сигурност и ефикасноста на судството во Северна Македонија“ и промоцијата на анализата „Отвореност на судството во Северна Македонија“, тој се осврна и на проблемот со откажувањето на еден од кандидатите за членови на Судскиот совет, Артан Лимани од граѓанскиот суд.
„Немаме надлежности да испитаме зошто ја повлекол кандидатурата. Комисијата за спроведување на избори на член на Судски совет не е комисија на Судскиот совет, туку во неа претседателот и еден член се избираат од Здружението на судиите, а другиот член од невладини организации. Тие понатаму одлучуваат како да ја спроведат целата постапка, меѓудругото тие треба да одговорат на барањето за повлекување на кандидатурата. Мое лично мислење е дека во оваа фаза од постапката не може да се повлече кандидатурата за член на Судскиот совет“, рече Здравев.
Тој истакна дека во понеделникот бил известен за повлекување на апликацијата на кандидатот, а тој ден, како што кажа, се делеле материјалите по избирачките одбори.
„Доколку тој кандидат победи, за нас официјално ќе биде член на Судски совет. Освен ако не си поднесе оставка, па да ја повториме постапката. Тоа е тешко, бидејќи ќе треба да се повтори целата постапка, до толку повеќе што на постоечкиот член на Советот, Шемседин Јусуфи му истекува мандатот и практично за цело време на траење на постапката ќе останеме без уште еден член“, потенцира Здравев.