Триесет и четири лица загинаа вчера во Појасот Газа кога израелски војници отворија оган врз толпа луѓе кои се обидуваа да стигнат до американско-израелските центри за дистрибуција на храна, соопштија здравствените власти, а очевидци го потврдија нападот. Тоа е најкрвавиот случај на ваков тип на напад откако минатиот месец беше воведен новиот систем за дистрибуција на хуманитарна помош, велат тие.
Триесет и три жртви паднаа на југ во близина на Рафа и една во центарот на Газа, тврдат тие.
Израелската армија засега не го коментира овој настан, но пред слични настани, кои се случуваа речиси секојдневно, армијата можеше да соопшти дека испукала предупредувачки истрел додека „осомничените“ се приближувале до позициите на израелските војници. Немало признание дека куршумите погодиле некого, пишува Бета.
Пред три недели беше пуштен во употреба нов дистрибутивен систем преку хуманитарната фондација Газа.
Палестинците велат дека имаат избор помеѓу гладување и ризикување со смрт кога трчаат покрај израелските војници во насока на центрите за дистрибуција.